• Home
  • Blog
  • Marketing
  • تقسيم السوق و الإستهداف من أمثلة في حياتنا اليوميه

تقسيم السوق و الإستهداف من أمثلة في حياتنا اليوميه

لاحظت حاجة غريبة جدا وانا بصلي الجمعه ف المسجد خلال ازمة كورونا … طبعا خدت كمامتي و سجادة الصلاه (المصليه) الخاصه بيا …
لاحظت ان انواع المصليات مع الناس مختلفه جدا … انواعها و اشكالها و جودة تصنيعها … تلاقي اللي شكلها غالي أوي و تلاقي اللي شكلها رخيص جدا …
ده شوفته في كذا مسجد في كذا منطقة … و طبقات إجتماعية مختلفه …

طب تستفاد ايه من ده في البيزنس و التسويق؟!

مشهور جدا إن من انواع استهداف السوق هو التقسيم الجغرافي
Geographic segmentation
الحقيقة ان النوع ده من التقسيم و الاستهداف ضعيف جدا و بقى ملهوش معنى في زمنا ده
لان ببساطه انت بتلاقي في الشارع الواحد (بل العمارة الواحده) تنوع رهيب في انواع العربيات عشان “دوافعهم” مختلفه!
وزي ما حكيت فوق هنا … اختلاف رهيب في انواع المصليات
يعني الناس اللي في منطقة واحده مش بتشتري نفس الحاجه او حتى حاجات قريبة من بعض!
دول بيتصرفوا بشكل مختلف جدا … “ودوافعهم” مختلفه…
هتلاقي اللي بياخد معاه مصلية غالية عشان رايح يقابل ربنا
هتلاقي اللي بياخد مصلية رخيصة كده عشان كده كده هتبهدل بره البيت و كورونا
هتلاقي اللي بيختار احسن او اقل مصليه عنده عشان اسباب و “دوافع” مختلفه!

طب تقسم السوق إزاي او تسهدف إزاي؟

انسى خالص موضوع المكان Geographic
بلاش تقول انا هستهدف الزمالك … المعادي … الهرم .. فيصل … امبابه … بولاق … أكتوبر… القرية الذكية … الشيخ زايد … التجمع الخامس…
خصوصا لو مشروعك مش مقفول ع المنطقة نفسها Location based زي الكشك و السوبر ماركت.
واهتم اكتر ب سلوكيات الناس و ايه “الدوافع” وراء سلوكهم ده
Behavioral segmentation
وده عشان توصله …محتاج تبدأ بشوية افتراضات بسيطه عن ديموغرافيا السوق
Demographic data
و ممكن تستخدم المكان ساعتها كعامل مساعد مش هو الأساس…

برضو من المغالطات في موضوع تقسيم السوق و الإستهداف هو

انا هستهدف الطبقة الأجتماعية العالية او المتوسطه
Class A or Class B
شخصيا لما بسمع الكلمة دي من حد بعرف انه سطحي جدا في التسويق (رأي شخصي جدا) ليه؟
لان الحقيقة في الغالب … ممكن يكون شخص في الأيه كلاس … يعني معندوش مشكلة في الفلوس و يقدر يشتري المنتج بتاعك … بس هو ببساطه مش مهتم او عنده أولاويات تانيه …
ده غير اني اصلا تعريفات الطبقات دي مختلف عليها … فلازم تحط شوية تعريفات ليها اصلا مع فريقك … يعني دخله الشهري في حدود كذا …ساعتها هتلاقي حد فاكر ان اللي دخله الشهري 30 ألف ده كلاس ايه … وحد تاني شايفه كلاس ب مثلا.

طب ايه الحل؟

نفس الكلام …فكر في سلوكيات و “دوافع” عميلك المحتمل وحاول ترسم له صوره في خيالك
Customer Persona or Avatar

لو عايز تشوف فيديو مثال عملي جدا

على الكلام ده من شخص بسيط جدا .. بياعة خضارشوف الفيديو ده

شاركني برأيك … و ياترى خدت بالك ان سلوكيات الشراء بتاعة الناس في نفس المنطقة مختلفه؟

Published on: September 11, 2020 - By: Taher Abdel-Hameed

Related Posts

حكاية أفضل استثمار عملته في البيزنس بتاعي! حاجة غير اللي في بالك تماما!

حكاية أفضل استثمار عملته في البيزنس بتاعي! حاجة غير اللي في بالك تماما!

حكاية منتج اتباع قبل ما يتعمل! واتعمل ناقص! ولسه مكملش! ومع ذلك العملاء بيشكروا فيه جدا!

حكاية منتج اتباع قبل ما يتعمل! واتعمل ناقص! ولسه مكملش! ومع ذلك العملاء بيشكروا فيه جدا!

لأ مفيش عروض للجمعة البيضاء /السوداء ولا المواسم! وجهة نظر مختلفة!

لأ مفيش عروض للجمعة البيضاء /السوداء ولا المواسم! وجهة نظر مختلفة!

المنتج ده سيئ وتحت توقعاتي! رحلة سريعة لفهم تعليقات العملاء

المنتج ده سيئ وتحت توقعاتي! رحلة سريعة لفهم تعليقات العملاء
>