من كام سنه …كان فيه شركه صينيه كبيره في المنطقه العربية….
كنت بحاول اوصل لمديرها العام او لمدير التسويق عشان اعمل صفقه معينه ….
المهم معرفتش اوصل ليهم خالص …
فين لما قابلت صديق صيني يعرف حد جو الشركه وصلني بيه …
و منه عرفت احدد اجتماع مع مدير عام الشركة ف مصر عن طريق السكرتيره …
قعدت اجهز للاجتماع …. و مظبط كل حاجه ..و ف اول الاجتماع نفسه حصل مفاجأة لا ع البال و لا ع الخاطر!
مدير عام الشركه دي مش بيتكلم انجليزي و لا عربي …. هو صيني بس!
يا نهار ابيض… طب هنتواصل ازاي …. جايب مترجمه عربي انجليزي صيني ..بالمناسبة كنت خدت كورس صيني زمان …. حتى نسيت اقوله نيهاو!
خلاصه الاجتماع انه من افشل الاجتماعات اللي عملتها ف حياتي!
بسبب لخفنة الترجمه اللي ف النص و ان المترجم مكنش من الصناعه …فحاجات كتيرة وقعت ف النص! وده بجد غلطتي انا …مش غلط المترجم..المهم بقى طلعت مستاء من الاجتماع و جه سؤال ساعتها ف بالي..الرجل ده جاي يعمل ايه ف بلد عربي …وهو لا بيعرف انجليزي ولا عربي!
ومش ماسك اي منصب …. ده المدير العام سيادتك!
و ف المقابل فيه صينين كتيير بقابلهم ف شركات تانيه معاهم لغات عربي و انجليزي و فرنساوي …
ايه اللي ف الرجل ده يخلي الشركه تعينه ف المنصب ده؟!?
و هو ملهوش علاقه بالمالكين للشركه ف الصين!!
لصراحه مش عارف …..
بس خلينا اشرح لك اكتر عن انجازات الشركة دي؟
- ماشيه ع نظام محدد ف كل الدول …هي اسطمبة وماشيه ع الكل!
- بتبيع كاش حتى لو السوق كله بيبيع ٱجل!
- فرع مصر محقق إنجازات …. لدرجه ان مقرهم الرئيسي بيتفشخر بيها!
- سياسه واضحه في التسعير ماشيه ف كل الدول! بشهاده منافسينها بيقولوا عليها مدرسه ف الحته دي!
- نمو واضح و مستمر ف مصر لكام سنه!
- فروع دول تانية لنفس الشركه ف بلاد عربيه برضو …. مديرها العام بيعرف انجليزي و لغات تانيه …. و مفهاش اي انجازات للشركه زي اللي ف مصر!
- مدير الشركه ده مش بيطلع ف الإيفنتات او اللقاءات الصحفية … بس فيه حد تاني بيعرف يتكلم انجليزي بيطلع بداله و بيعمل شغل حلو ف الإلقاء و الشو
عرفت بقى ان البوب الكبير ده … اه اللغه عنده ضايعه … بس عارف يمشي ع نظام الشركه …فحقق انجازات محصلتش ف تاريخ شركته!
اه صحيح الإجتماع فشل بس كمية الدروس المستفاده من الموقف ده رهيبة:
- جميل اوي انك تعرف عيوبك و تحاول تصلحها ….بس عارف ايه الأجمل؟
انك تشتغل ع نقاط القوه بتاعتك
و لو عندك نقطه ضعف معين …
ممكن تعوضها بإنك تستعين بحد تاني يشيل عنك الحتة دي اصلا وركز انت ف اللي بتعرفه
- اللغه يا صديقي عامل مساعد (مهم جدا) لو بتفهم بيزنس و هتكبرك بسرعه ….لكن لو مش بتفهم بيزنس فانت هتبقى منظر حلو ع الفاضي!
- كل واحد عند حته مميزه اوي …. ساعده انه يستغلها وبلاش تقارنه وتظلمه
وأهم درس يا صديقي:
وانت بتعين ناس تشتغل معاك …. مهم اوي تبص ع سلوكهم وطريقة تفكيرهم attitude
اكتر من مؤهلاتهم …. و كورساتهم …. وخبرتهم
مثلا يعني حد عندو Can-do attitude إستعداد ل فكره هقدر اعملها
ده هيتشقلب عشان يعمل المهمة المطلوبه … عكس حد بيشوف ف كل خطوه مصيبة خايفه منها!
اخيرا ما تشغلش بالك كتير ف ايه اسم الشركه دي …. لانك مش هتعرفها! …. مشهوره ف صناعة متخصصه شويه! وتم تغيير بعض الكلام عشان متعرفهاش برضو P:
Post Photo Credit:
صورة البوست زي ما هو باين انها من Blue Jean Images