دول 3 طرق عشان تتعلم بيهم الاقتصاد من غير ما ترجع تدرس ف الجامعه ولا المدرسه!
من ايام الأزمة العالمية في 2008
وناس كتيير مهتمه تعرف عن الاقتصاد
وبتصاب باحباط من كتر المصادر المكلكعة ف المجال ده
الخبر الكويس ان ف المقال ده
بعض المصادر الرائعه عشان تتعلم اقتصاد و اغلبها مجاني
الجميل اني لقيت فيهم مصدرين كنت درستهم قبل كده
ودول اللي برشحهم لنفسي و ليك دلوقتي
المصدر الاول: كورس اقتصاد ع كورسيرا من جامعة كاليفورنيا
درست منه شوية من سنتين (لسه مكملتهوش ) ?
قعدت ابيع في المعلومات اللي خدتها من كام محاضره بيع السنين!
لو مش فاهم يعني ايه ابيع هنا؟
يعني فادني كتيير ف شغلي لدرجة اني اتكلم و احلل باللي فهمته من المحاضرات دي …. واللي يسمعني يحترم وجهة نظري … مش بفتي و خلاص يعني
تخيل بقى لو كملت الكورس كله هعمل ايه!
واللي بيشرح البروفسور بيتر نافرو
Dr. Peter Navarro
لو متعرفهوش …. مش مشكله انا كمان مكنتش اعرفه! ?
بس طريقة شرحة هتحليك تدعي باللعنه ع دكاترة الجامعه اللي كرهوني و كرهوك في الاقتصاد!
بيشرح بطريقه عملية جدا ? …بسيطة جدا …في مقدمة الكورس بيقولك امثلة اقتصادية في حياتك و ازاي تاخد القرار فيها بناء ع الاقتصاد
وده اللينك بتاعه:
- The Power of Macroeconomics: Economic Principles in the Real World
- The Power of Microeconomics: Economic Principles in the Real World
تحديث عن د/ بيتر نافرو (27-ديسمبر 2020)
من الحاجات اللي ممكن تزعلك انك تعرف انه الدكتور بيتر نافارو هو مستشار في الشؤون الاقتصادية للرئيس دونالد ترامب. و هو سبب رئيسي وراء الحرب التجارية بين أمريكا و الصين في 2019 و 2020. وله العديد من الكتب بتحذر من المارد الصيني القادم….تقدر تقرأ عنه اكتر هنا. وبالبحث عنه ستجد العديد من التقارير عنه على اليوتيوب بالعربية مثل هذا التقرير.
ده طبعا لا يمنعك انك تتعلم منه في الكورس ده و بقية كورساته على موقع كورسيرا. لأن الهدف أن تتعلم مبادئ الأقتصاد لا ان تقنع بأيدولوجيات من تتعلم منه!.عارف إن في علم مثلا الأقتصاد ده صعب شويه بس الكورس اللي فوق رائع يستحق التجربة.
المصدر التاني: كتاب 50 فكره يجب ان تعرفها عن الاقتصاد
الكتاب ده انا اكعبلت فيه كده من سنتين في مكتبة الشروق ف القاهره
50 Economics Ideas You Really Need to Know
قريته و اداني شوية ابعاد كويسة جدا عن الاقتصاد
لقيته ساعتها مترجم عربي بس للاسف الترجمة مش دقيقة اوي وفيها شوية اخطاء في الترجمة الاقتصاديه (قليله)
فلو تقراه بالانجليزي هيبقى احسن
الكتاب النسخة العربية على موقع قارئ جرير
المصدر التالت: اللي برشحه ليك …كتاب قصة الاقتصاد المصري ل جلال أمين
وده انا انا اشتريته الشهر ده و لسه مقرتهوش الصراحه
بس عمر الشينيطي Omar El-Shenety
وهو احد خبراء الاقتصاد في مصر رشحه ليا قبل كده اني أبدأ بيه كغير متخصص في الاقتصاد
لما قريت شوية عنه د/ جلال امين (الله يرحمه) انبهرت بسيرته و الكتاب قصته شيقة …
يالا اديني حاطه ع رف القراية اليومين دول.
الكتاب على موقع مكتبة الشروق و على أمازون كيندل
نرجع بقى للمقال الاصلي على Business Insider
بيقولك فيه 3 مصادر رئيسية عشان تتعلم الاقصاد بره الجامعه
و تحتها حاجات كتيير اوي :
- محاضرات ع اليوتيوب
- كورسات MOOCs
- كتب سهله لغير المتخصصين
اخترت لك منهم المصدرين اللي فوق + كتاب قصه الاقتصاد المصري
يعني ملكش حجة ولانا كمان ليا حجة اني اكمل كورس كورسيرا ده ?
خد لك لفه كده في المقال من هنا … وقولي لو كتاب او كورس تاني عجبك … تشجعنا نسمعه او نقراه معاك؟
هتلاقي ف المقال مصادر كتيرة تحت كل نوع
Post’s Image Credit: same article link; REUTERS/Lee Jae-Won