عشان الناس اللي سألت مش عارفه تدخل على موقع بنك المعرفه من خارج مصر؟ هل فيه طريقه؟
خلينا نعرف شويه حاجات سريعه كده
عشان تدخل ع محتوى ع النت مفتوح فقط ف دوله معينه … فأنت عشان تدخل ع المحتوى ده فيه طريقتين:
- تكون موجود جوه الدوله دي ?
- خلال ادوات تغيير IP و VPN
ودي خدمه (فيه منها مجاني و مدفوع) بتخلي جهازك كأنه ف الدوله دي …
.عشان كده في خدمات كتيره متاحه في أمريكا و الناس بره أمريكا بتعرف تدخل لها ….
السؤال بقى … ليه المصريين اللي بره لما جربوا VPN عشان يدخل ع بنك المعرفه … معرفش يدخل؟!
عشان ببساطه فكره VPN انه بيحط سيرفرات معينه في دول معينه عشان يخليك جوه الدول دي …
بما أن مصر أم الدنيا …. (وغالبا بقية دول العرب) محدش حاطط فيها سيرفرات للخدمات دي… فمش هينفع تستخدم VPN عشان تدخل محتوى مفتوح فقط جوه مصر! … وده طبعا ع حد علمي من الخدمات الي جربتها قبل كده …. مكنتش بشوف فيها مصر و لا أي دوله عربية
المهم نعمل ايه دلوقتي:
مبدأيا اعترف انك غلطان عشان سايب مصر أم الدنيا و النعيم اللي احنا فيه و قاعد بره ??
ثانيا تعالى نتكلم ف المهم
عندك طريقتين:
- تخلي واحد صاحبك جوه مصر… ينزل لك الكتب اللي انت محتاجها …
ودي طريقة عقيمه … عشان انت بتبقى عايز تستكشف الكتب بنفسك و تنزل اللي يعجبك …. - الطريقة التانيه وهي دي سبب البوست بقى
عن طريق التحايل (المشروع) ع الموقع … بإستخدام برامج المساعده عن بعد أو مشاركة الشاشة و التحكم في الكمبيوتر عن بعد
يعني ايه؟
هتنزل برنامج اسمه TeamViewer
وده مجاني للأستخدام الشخصي الغير تجاري
وهتخلي واحد صاحبك او قريبك ينزله ع الكمبيوتر بتاعه (لازم يبقى فيه ثقة بينكم شوييتين تلاته)
الفكره ببساطه …
لما صاحبك (اللي جوه مصر) يفتح البرنامج ده … هيطلع له
ID & password متغيرين و بيستخدموا عشان تديهم لحد يحل لك مشكله فنيه ف الكمبيوتر عن بعد
دول بقى صاحبك يبعتها ليك
و تدخل من خلال البرنامج علي جهاز صاحبك
صاحبك يوافقك انه يدخلك ع جهازه ويديك التحكم ف الماوس و الكيبورد
بس كده …تقدر تدخل ع بنك المعرفه من جهاز صاحبك … وتعيش التجربه كامله كأنك في مصر
صاحبك محتاج يسيب الكمبيوتر مفتوح ليك و يريح هو شوية ….
وانت خليك ضيف خفيف و خلص بسرعه
بعد ما تنزل الكتب اللي انت محتاجها ع جهاز صاحبك …. خدها منه سواء من خلال البرنامج او أي وسيلة أرسال ملفات تانيه
اتمنى تكون الفكره تحل مشكله المصريين اللي ف الخارج … خصوصا الباحثين منهم … وعايز يدخل على الكنز ده
ملحوظة: انا مجربتش الفكره بنفسي ع موقع المعرفه …بس منطق الفكره بيقول انه مفيش ما يمنع تماما انها تشتغل. البرنامج ده جربته قبل كده كتير في ان حد من بره مصر يصلح لي حاجات ف الجهاز بتاعي
مفيش أي ضرر من أستخدام الطريقة دي للطرفين …. في حالة الثقة لو موجوده ….
يبقى خلي صاحبك اللي ف مصر يغير TeamViewer Password
بعد ما تخلص … يادوب هيدوس ع زرار زي Refresh كده و هيتغيرو لوحده
◀ يا ترى الموضوع يستاهل كل ده!
- مبدأيا الخطوات دي بسيطه جدا
- ثانيا اه يستاهل في حاله ان بتحب تتعلم و تقرأ كتب في مجالك … فده طريق شرعي (مش سرقة كتب من مواقع التحميل التانيه) و مجاني ليك يا مصري
- ثالثا …. إلحق استخدم المنصة …لاني فيه صديق لي قالي ان المنصة ميعاد تجديد العقود مع الناشرين اخر سنه 2020
وهتلاحظ ف الفيديوهات المنصه ع اليوتيوب موجود ناشرين زي “أكسفورد” مبقاش موجود دلوقتي … وده معناه إن التعاقد مع الناشرين بيتغير …إلحق إستفاد بقى … ملكش حجه
قولي ف التعليقات لو جربتها و نفعت معاك …. و ربنا يوفقك في سعيك
وشارك المقال دلوقتي مع صاحبك اللي بره مصر و حابب يتعلم من كتب و دوريات حديثه جدا
لينك للمقال اللي اتكلمنا فيه عن بنك المعرفه و إزاي تستفاد منه؟
الملحقات
- لينك لتحميل البرنامج TeamViewer من الموقع الرسمي
- من منصه SoftPedia وفيه فيديو بيشرحه برضو
- فيديوهات شرح البرنامج على اليوتيوب بالعربي
- لينك للمقال اللي فات عن بنك المعرفه لو لسه مقرتهوش: إزاي وفرت أكتر من 600 دولار من خلال بنك المعرفه المصري و كيفية إستخدام الموقع