سوق مصر من أعجب الأسواق فعلا! خلال أزمة كورونا

سوق مصر من اعجب الأسواق فعلا …
ازمة كورونا؟ الطبيعي و المنطقي إن يحصل هبوط في سوق السيارات الجديدة
الناس “المفروض” قللت تحركاتها و ناس كتير اشتغلوا من البيت .. وناس فقدت وظايفها!
المفروض كل ده يؤدي إلى نتيجة سلبية على سوق السيارات!
لكن اللي حصل اني مبيعات السيارات زادت
شوف الخبر ده

حققت مبيعات سوق السيارات المصرية ارتفاعًا نسبته 21.57% خلال أول تسعة أشهر من 2020
حيث وصلت إلى 152 ألفا و332 وحدة في مقابل 125 ألفا و306 مركبة في الفترة المماثلة من العام الماضي
وجاء النمو مدفوعا بمبيعات قطاع سيارات الركوب التي ارتفعت بنحو 23%
لتسجل 107 آلاف و617 وحدة، مقارنة مع 87 ألفا و272 مركبة خلال فترة المقارنة
وفق التقرير الصادر عن مجلس معلومات سوق السيارات “أميك”.
وشهدت مبيعات سبتمبر نموًا بنسبة 11.25% عبر بيع 22 ألفا و905 وحدات، مقابل 20 ألفا و589 مركبة مباعة في نفس الشهر من 2019.

ملحوظة: الخبر بيقيس سنويا يعني كده موسمية الطلب مش مأثره اوي

السؤال بجد دلوقتي … ليه مبيعات السيارات زادت؟

مش بس كده ده كل السلع الترفيهه زادت بشكل غريب و عجيب
مبيعات التليفزونات زادت … الموبايلات زادت …. اشتراكات المواقع الترفيهيه….
ايه الحكاية؟!

ممكن يكون التسهيلات اللي حصلات من قروض البنوك والسداد مع بداية ازمة كورونا هي السبب وراء زيادة السيارات؟
ممكن برضو حاجة تانية يكون حصل ازمة في سوق السيارات في 2019 (يعني سنه المقياس هي اللي فيها مشكله اصلا …) الحقيقة أنا شخصيا مش عارف عشان مش تابع السوق ده…..بس افتكر ان كان فيه مقاطعه للسيارات الجديدة مش فاكر اذا كانت في 2018 ولا 2019 …
ودي حاجة بجد بتزعلني في الصحافة المصرية (هنتكلم فيها قريب لانها احد مصادر ابحاث السوق) انه لما بينشر تقرير مش بينشر سياق متكامل تفهم منه الصورة بشكل صحيح … وده للأسف ممكن يكون مقصود في الحاله دي عشان اللي مأجل قرار الشراء … يشوف تقرير زي كده يقولك ماهو الناس بتشتري اهيه ويالا بينا

طب و التليفزيونات و الموبيلات؟

الناس قاعدة في البيت تشتري تلفزيون كبير و ضخم! رغم ان عندهم اصلا واحد او اتنين بالفعل؟!
و الموبيلات بحكم شغلي اعرف زمايلي من بعض العلامات التجارية (برنادات الموبايل) البياعه في الفتره دي مكنش مصدق أرقام السيستم بتاعهم (أرقام التنشيط Activation numbers اي حد بيفتح الموبايل الجديد بيبان عنده على السيستم)… خلال ازمة كورونا وقال أكيد فيه مشكله في البرنامج مش معقول ان الناس بتشتري بالكميات دي من براند واحد! ونزل خد لفه بنفسه في المحلات وسألهم هو انت بجد بعتوا الموديل الفلاني بالكميات دي امبارح؟! وطلعت المبيعات حقيقية!

شركة تانية من اكبر الشركات اللي في مصر في احد المجالات اللي مش اساسيه دلوقتي … حصلت مبيعات خرافية عنده … بيقولي والله يا طاهر احنا نفسنا مش عارفين هو ايه اللي بيحصل و إزاي كميات المبيعات دي بتحصل في الظروف دي …

سافرت البلد اثناء عيد الأضحى …قرية صغيرة … لقيت 10 اشخاص من اللي اعرفهم غيروا موبيلاتهم خلال ازمة كورونا بموبيلات تانية احدث و اغلى رغم إن حالتهم الاقتصادية مش قد كده!  ده كمان فيه منهم جاب موبيل جديد لأولاده عشان الدراسه و المذاكره …..

أحد الأجابات ممكن تكون؟

ممكن برضو احد الاجابات هي كمية المشاريع الإنشائية اللي حصلت في خلال ازمة كورونا كتيره جدا (مدينة نصر بقت كلها كباري … كل الطرق السريعه تقريبا حصل فيها اصلاحات او توسعات …
كل ده بيشغل كمية ناس كتير عماله مؤقته باليومية وبالتالي بيصرفوا فلوسهم على اكل و شرب و اساسيات مثلا… فالمحلات تكسب … فموظفين المحلات يقبضوا …إلخ…. عجلة اقتصاد ودوران فلوس …

ممكن برضو يكون التقسيط هو الاجابه؟!

طب وإزاي حد يصرف ما هو قادم (بيقسط دخله المستقبلي) وهو مش ضامن بكره بجد بكل المقاييس .. إقتصاد عالمي ضايع … توتر تجارة عالمية امريكا و الصين …وفوق كل ده وباء عالمي بيشقلب الدنيا حواليك ؟ نسب بطاله بتزيد؟
كل ده High uncertainty conditions
ومع ذلك سلوك المستهلك المصري … مازال بيصرف فلوسه مش بيدخرها!
ده طبعا خبر حلو جدا للمنتجين و للشركات و لعجلة الاقتصاد بشكل عام … بس السؤال بجد هو ازاي كده!


بالمناسبة في احد المصادر حاولت افهم تقرير السيارات ده… لقيت المعلومه دي…

…….قال المهندس رأفت مسروجة، الخبير في صناعة السيارات، والرئيس الشرفي لمجلس معلومات سوق السيارات “أميك”، إن بيانات وإحصائيات تقرير أميك تعتمد على مبيعات الوكلاء للموزعين بغض النظر عن بيع هذه المركبات للمستهلك النهائي أم أنها مخزنة لدى الموزعين والتجار.
…….وفي السياق ذاته، وصف كريم نجار، رئيس مجلس إدارة إحدى شركات السيارات، تقارير مجلس سوق السيارات “أميك”، بالفشل، نتيجة عدم تقديمها بيانات واحصائيات دقيقة، قائلًا: “الأرقام مبالغ فيها، ولا تنم عن السوق الحقيقي لأنها لا تسجل عدد السيارات التي تم ترخيصها”….
……وأضاف المهندس خالد سعد أن أرقام المبيعات الصادرة عن مجلس سوق السيارات تعتد على مبيعات السيارات سواء من الوكلاء للموزعين والتجار أو للمستهلك، ولا تعتمد على التراخيص، لافتًا إلى أن الشركات ترسل أرقام مبيعاتها مع نهاية كل شهر عبر “الإيميل”، ثم يقوم المسئولين بتجميعها وتحليلها ومن ثم الإعلان عنها.

كده يبقى ارقام المبيعات دي Sell-Through بمعنى المبيعات من الوكيل/او البراند إلى التاجر وليس للمستهلك.
ودي نقطه مهمه جدا عشان تفهم الأرقام…
وفي منتج بيتحرك ببطئ شوية زي السيارات الرقم ده خداع جدا على عكس المنتجات السريعه الدوران.
وده بيلمح إن موضوع القروض ممكن يكون السر وراء فهم الزيادة في السيارات … الموزعين والتجار اشرتوا بضاعه اكتر بتسهيلات؟! ده مع فرض إن ارقام التقرير صحيحه
كلها مجرد تخمينات وبفكر بصوت عالي معاك

يالا شاركني بتعليقاتك على الموضوع … عشان نحاول نفهم شويه مع بعض


ملحوظة: مصدر ونص خبر مبيعات السيارات من: Economy Plus
و لينكات أخرى مصادر للخبر:
https://economyplusme.com/51004/
https://www.egyptautomotive.com/1168240
https://dotalkhaleej.com/economy/2326292
https://enterprise.press/stories/2020/11/01/car-sales-up-in-september-as-sector-continues-recovery-from-covid-slump-24006/ 
و هنا نقد رائع لمصدر التقرير ده من رجال صناعة السيارات نفسهم
https://www.albawabhnews.com/4009152

Published on: November 1, 2020 - By: Taher Abdel-Hameed

Related Posts

تأثير كورونا على مبيعات الموبايل في مصر 2020Q2

كيف تنظف و تحذف البيانات المتكرره في الإكسيل بكل سهوله في التسويق

كيف تستخدم Excel VLOOKUPفي التسويق لتجميع بيانات من مصادر مختلفه

كيف تحضر ندوات و إجتماعات رجال الأعمال في مصر مجانا من الغرفة التجارية الأمريكية

>