حكاية الشركة اللي شقلبت صناعة السيرك و عملت منه بيزنس مربح جدا Blue Ocean Strategy!

حكاية الشركة اللي شقلبت صناعة السيرك و عملت منه بيزنس مربح جدا في حين ان اكبر شركات السيرك بتعاني!
Cirque du Soleil
من فترة كان في اعلان في الشوارع و اونلاين .. ان شركة “اتصالات مصر” راعي لايفنت للسيرك ده ف مصر..
الصراحه انا لما شفته … قولت اسم السيرك ده مش غريب عليا … انا قريت قصته فين قبل كده ؟!
اوبا…. ده نفس السيرك اللي الكتاب الرائع ده
Blue Ocean Strategy استراتيجية المحيط الازرق…. اتكلم عليه ف اول مثال لفكرته

ايه الحكاية؟

سيرك دو سوليه Cirque du Soleil
الشركة دي اتإسست في 1984 في كندا
و حققت ارباح  في 20 سنه في سوق السيرك قد اللي حققته اتنين من اكبر شركات السيرك ف العالم لمده ١٠٠ سنه مجتمعين ….
انت متخيل الأرقام!
عشان تتفاجأ اكتر … ده حصل ف انهي صناعه/سوق؟؟ حصل ف سوق السيرك اللي هو سوق مش جذاب ولا بينمو .. ده سوق بيتقلص اصلا ساعتها…

معايير ادوات تحليل السوق الإستراتيجية

السوق ده بمعايير ادوات تحليل السوق الإستراتيجية زي Porter 5 Forces Analysis
سوق مش جذاب خالص بكل المقاييس …

  • موردين السيرك ليهم قوه كبيره ف التفاوض .. مثال فنانين السيرك المتميزين بيتحكموا ف تكلفة السيرك
    ودي قوة الموردين Power of suppliers
  • العملاء بقى عندهم بدائل رهيبه للترفيه .. بدل من السفر عشان يشوفو السيرك … بقى عندهم بدائل كتيره زي وسائل الترفيه البيت …. العاب فيديو للاطفال … او حتى يروحوا أحداث رياضيه…
  • و كمان الاطفال (اللي هم كانوا اكبر زبون مستهدف للسيرك) بقو بيلعبو بلاي ستيشن بدل من انهم يروحو السيرك. ودي قوة العملاء  و قوة البدائل للمنتج
    Power of customers / Buyers + Threat of substitute products
  • مش بس كده… ده كمان تزايد شعبية حركات احترام حقوق الحيوان وانه مينفعش يستخدم ف الترفيه ف السيرك …..
  • كان فيه كام شركه مسيطره ع صناعة السيرك هناك … وهم اللي بيحطوا المعايير …
  • كل ده خلى صناعة السيرك بتخسر زباين … و كمان بتخسر إيرادات رهيبه سنه عن سنه

يانهار ابيض … طب ازاي الشركة دي كسبت كل الفلوس دي من السوق ده ف الظروف دي؟!!!
و عشان تتفاجأ أكتر و أكتر …. الشركه دي سابت اكبر جمهور للسيرك ساعتها …. وسابت حاجات اساسيه ف السيرك … وراحت في حته تانية خالص!

طب عملت كده إزاي؟

وإزاي نستفيد من ده ف البيزنس بتاعنا؟
الإجابه السريعه
راحت لحته تانية خالص من السوق السوق متقسم (بحسب الكتاب) لنوعين:

  • سوق أحمر : و ده مليان بالمنافسه و كله بيقطع ف بعض عشان ياخد حتة من الكيكة
  • سوق ازرق: وده سوق جديد لسه بكر ولسه قواعد السوق فاضيه

لو مش فاهم حاجه …. ده طبيعي … انت مش لوحدك 😁

“ببساطه الشركه دي بصت ع سوق السيرك بطريقة مختلفه” 👌🧐🧐… :

  • “ايه العروض (المنتجات) اللي بتتقدم من خلال اي سيرك؟ المنافسين مركزين ع ايه؟”
    • شوية عروض بالحيوانات – تعيين نجوم السيرك الحريفه – عروض الدواير واللعب بالحلقات – اللعب بالعجل (الدرجات) – عروض البهلوان الملون …
    • وكمان مركزين اوي انهم يبيعوا تذاكر الصفوف الاولى المميزة
  • “طب ايه اكتر حاجه مكلفه” ف السيرك:
    • عروض الحيوانات و أكل الحيونات ورعايتها و نقلها من مكان للتاني و التأمين بتاعها …
    • ده بالإضافه إلى نجوم السيرك نفسه اللي بيقوموا بالعروض … أغلب المنافسين كانو بيركزوا ع المشاهير و بالتالي مرتباتهم أعلى
  • “مين ممكن يكون مهتم” بالسيرك “غير” الإطفال؟
    • ممكن الكبار
  • “يا ترى ممكن نعمل ليهم ايه” مع السيرك؟ ”ايه الاضافات الاي ممكن نقتبسها من مجالات تانيه؟”
    • اه ممكن شويه اقتبسات من سوق المسرح (عروض المسرح)

◀ زي ما انت شايف … “كسروا كل حته ف السوق ده بتعتبر بديهيه” و “اعادت بناء منتج جديد مخلوط من كذا سوق/صناعه” … زي ما هنشوف دلوقتي:

  • شالو الحيوانات من السيرك ….
  • شالوا نجوم السيرك المشهورين وخلوا البطل هو العرض نفسه مش مين بيقوم بيه
  • خلوا ألعاب الاكروبات و البهلوان و الشقلبات …. بس قللوها و حطو عليها “التاتش” بتاعهم
  • “اقتبسو فكره” قصه العرض … بدل ما كان السيرك شوية عروض ملهاش علاقة ببعض …. خلو لكل عرض سيرك قصه عبارة عن عروض فرعيه بتكمل و تحكي القصه دي … (الفكره ده مقتبس من صناعة مختلفه وهي صناعة المسلسلات و المسرحيات)
  • “اضافو” موسيقى و عروض فنية تكمل قصة عرض السيرك
  • “شالو فكره” الكراسي الناشفه و عملو كراسي مريحه اكتر و في سياق العروض …
  • نوعوا انتاج العروض و بيغيروها من وقت للتاني … وكل عرض ليه قصه … وده خلى الناس تيجي اكتر من مره … على عكس السيرك التقليدي اللي فيه عروض ثابته و محفوظه

بإختصار الشركه دي … “خدت الحلو” من السيرك و المسرح و
“ضربتهم ف الخلاط فطلع حاجه جديده”
لا هي مسرح …. و لا هي سيرك بالمعنى التقليدي!
و بكده عملت
Blue Ocean Market
حته جديدة هي اللي بتلعب فيها لوحدها

طب ايه اخبار التكلفه؟ السعر؟

بما إنها “شالت اغلب الحاجات اللي كانت تكلفتها عاليه” …. زي الحيونات و النجوم المشهورين …
و مش بس كده …دول بقى بيسعروا تذاكرهم بالمقارنه بأسعار المسرح … اقل شويه من سعر المسرح
و اعلى من سعر السيرك العادي وده اللي الكتاب بيسميه
Value Innovation
انك تعمل منتج مبتكر وعملي للعميل وفي نفس الوقت سعره معقول

طب و استهدفوا مين؟

فك بقى من جو الاطفال ده ….و هاتلي الكبار و البالغين اللي بيروحو المسرح عشان يتبسطوا
وخلو دول الجمهور الأساسي بتاعهم وده فتح ليهم سوق الشركات و المؤسسات
Corporate deals
زي ما انت شوفت كده …لما جات مصر … شركات اتصالات وهايد بارك و كوكاكولا و شركات تانية كانوا رعاه للحدث
ده غير سعر التذاكر نفسه اللي كانت ف مصر من 600 جنية ل اكتر من 3000 جنية
بالمقارنة بالسيرك القومي مثلا (ك سيرك تقليدي) افتكر اغلى تذكره عنده ب 150ج
اه عارف ان مقارنة الأسعار مش عادلة عشان السيرك الاول اجنبي ودولي … بس شوفها من زواية ان فيه حد عنده استعداد يدفع 3000 ج عشان يحضر عرض سيرك في حين انه ممكن ميرحوش اللي ب 150ج بس!

بس يا سيدي و دي كانت حكاية سيرك دو سوليه

◀ انت بقى تستفاد من ده ايه؟

– ارجع فوق تاني واقرأ اللي بين علامات “التنصيص وخط عريض” و طبقه ع البيزنس بتاعك

و ده ملخص سريع اوي ل 6 خطوات بتوع Blue Ocean

  1. Reconstruct market boundaries
    كسر حدود السوق و عيد بناءه من تاني
  2. . Focus on the big picture, not the numbers
    ركز ع الصورة الكبيرة مش الارقام … ايه اللي تقدر تشيلة او تضيف هنا ف السوق
  3. . Reach beyond existing demand
    شوف مين من العملاء (الطلب) تقدر توصلهم غير الحاليين او المتعارف عليهم ف السوق
  4. Get the strategic sequence right
    ابدأ التفكير الأستراتيجي بالشكل المظبوط …. وده بيبدا من عند العميل … و المنفعه الحقيقة لمنتجك او فكرتك
  5. Overcome key organizational hurdles
    تغلب ع عوائق التنفيذ ف شركتك
  6. Build execution into strategy
    من سياسيات داخلية … لفريق عمل محبط … لموارد محدوده … ابني التنفيذ جوه الخطه نفسها

وفلسفة الكتاب الإساسية

The only way to beat the competition is to stop trying to beat the competition. Make the competition irrelevant.
احسن طريقة انك تتغلب ع المنافسه … انك تبطل تحاول ان تغلب المنافسين اصلا!
إلعب في حته تانية وخلى المنافسين ملهمش علاقة بيك!”.

معلومات عن الكتاب:

Blue Ocean Strategy: How to Create Uncontested Market Space and Make the Competition Irrelevant

الكتاب اتكتب ف سنه 2005 و من ساعتها من افضل الكتب مبيعا ع أمازون
المؤلفين :
W. Chan Kim + Renée Mauborgne
عملوا كتاب تاني ف سنه 2017
Blue Ocean Shift: Beyond Competing – Proven Steps to Inspire Confidence and Seize New Growth
فكره الكتاب (الإساسي) مبنية ع دراسة مدتها 10 سنوات للقرارت الإستراتيجية لأكتر من 108 شركة في صناعات مختلفه

اتمنى يكون مقال مفيد بالنسبه لك …. شاركه مع أصحابك عشان يستفادو برضو

ولو انت حضرت عرض السيرك ده ف مصر … قولنا تجربتك و انطباعك ف التعليقات

Article Photo Credit to Etisalat Misr ad campaign with some edits 😀


و لو عايز تقرأ خواطر و حواديت أكتر في البيزنس و التسويق مكتوبه من القلب
تابع المقالات على
#حواديت_في_البيزنس

Published on: أكتوبر 16, 2019 - By: Taher Abdel-Hameed

Related Posts

يا ترى العميل بيشتري ايه بالظبط؟ حكاية صديقي و مطعم خرافي

إقرأ افضل مقالات البيزنس و التسويق تم نشرها هنا في 2020

كيف تنافس الشركات الكبيرة أو المسيطره على السوق بطريقة ذكية و فعاله؟

خاطره عن خبر: جروبات الياهوو رسميا ماتت خلاص

>