البطيخ الأصفر و التسويق

عمرك شفت بطيخ اصفر!
ايوه زي ما انت قريتها كده!

من حوالي 3 سنين و انا ماشي في كارفور بشتري شوية حاجات عادي جدا ….
فجأه شوفت بطيخ أصفر و دي كانت اول مره اعرف اني البطيخ مش بس أحمر🍉 !
عجبنتي الفكره جدا …قولت ليه لاء نجرب …  اشتريت بطيخة صفرا… !
جربتها ….  طلعت مش بس صفرا… دي من غير بذر كمان!
ايه علاقة ده بقى بـ لتسويق و البيزنس !

◀ في مفهوم في التسويق ظهر في 2004 عن طريق واحد اسمه “كريس اندرسون”
Chris Anderson
كتب مقال عن فكرة “الذيل الطويل” Long Tail
وبعد كده الموضوع وسع منه شويتين وكتب فيه كتاب 📙 ف 2006  (بقى من افضل الكتب مبيعا في التسويق على امازون)
ده اسم الكتاب
“The Long Tail: Why the Future of Business Is Selling Less of More.”
بالعربي معنى الأسم: ليه مستقبل البيزنس في انك تبيع أقل من اللي بيتباع كتيير!

برضو ايه علاقة ده بحكايتي مع البطيخ الاصفر! 🤔

الفكره ببساطه

Long Tail Marketing
او تسويق الذيل الطويل بيقول ايه؟
ان المنتجات او الخدمات اللي مش مشهورة او مش عليها طلب كبير … او  اللي مش بتباع بكميات كبيرة …
ممكن تجمع مع بعض وتعمل ربح كويس اوي … وغالبا الربح ده هيبقى افضل من المنتجات اللي بتتباع كتيير او اللي مشهورة

💡
زي في الرسم البياني اللي في الصورة ده
الجزء الأحمر ده الرأس … وبيمثل المنتجات المشهورة
الجزء البرتقاني و ده الذيل … وبيمثل المنتجات المتخصصة و الغير مشهورة/شائعه
المحور الرأسي بيمثل مدى شهرة المنتجات
المحور الأفقى بيمثل المنتجات
الجميل في الموضوع انك لو جمعت الذيل (البرتقاني) ورفعته لفوق عشان تقارنه بالاحمر (زي ع اقصى شمال الصورة) ….

هتلاقي الذيل اكبر بكتيير من الرأس
ليه؟….لكذا سبب :

  • 💡ان غالبا المنتجات دي بتستهدف ناس قليله او بمعنى اصح ناس خاصه/متخصصه Niche Market 🧐
    وفي الأسواق المتخصصه دي
    المنافسه بتبقى قليله اوي … فالربحية كويسة
    وبرضو معدل شراء العميل أسرع و افضل
    Better conversion rate and better profitability
  • 💡 تكاليف تسويقها و توزيعها غالبا أقل
    غالبا برضو الشركات مش بتعمل لها دعاية مباشرة …

    مثال عمرك شوفت كارفور حاطط ف البروشور بتاعه اي عروض ع البطيخ الأصفر اللي فوق ده!
    لان غالبا العميل هيتكعبل ف المنتج جوه لو هو مهتم بالفاكهة المستورده و اللي مش مشهورة في مصر

    مثال تاني
    لك ان تتخيل موقع زي أمازون لو جمعت ربحية مبيعات الكتب المتخصصة Niche books
    هتعدي ربحية مبيعات الكتب المشهورة عنده … لاني أي حد عايز الكتاب المتخصص اوي ده صعب يلاقيه غير على أمازون …  فهيشترية بصرف النظر عن السعر 💵 …
    ع عكس الكتب المشهورة … العميل هيدور ع احسن صفقة

    مثال تالت:
    جوجل جزء كبيير من أربحها من إعلانات المعلنين الصغار … مش من كبار الشركات!

النظرية دي ليها تطبيقات كتيرة :

  • الشركات ممكن تركز ع مبيعات كذا سوق متخصص احسن من انها تدخل في سوق كبيير زحمة بالمنافسه
  • في مجال التسويق الأونلاين و تحسين محركات البحث SEO
    بدل ما تستهدف الكلمات المشهورة …. فكر في كلمات متخصصه العملاء بيستخدموها لما يدورا ع المنتج ده
    هتلاقي كمية البحث عليها قليله بس فاعليتها كبييرة جدا
  • في مجال التسويق بالمحتوى ..Content Marketing
    ان المحتوى اللي انت عملته ده … عدد زوارة وقرائه ع المدى الطويل اكتر بكتيير من عدد القراء ع المدى القصير اللي شافوه بمجرد نشرك له … فإستمر ف عمل و نشر المحتوى بصرف النظر عن الزوار اللي ف الاول … اللي جاي احلى و اكتر!
  • في مجال التجارة الإلكترونية E-Commerce
    ودي اصلا السبب ف ظهور النظرية دي .. وهي اشهر تطبيق ليها ..
    كمتجر إلكتروني انت معندكش مشكله مساحة الأرفف مثلا …
    فتقدر تركز و تعرض منتجات متخصصة لا حصر لها …
    وتستخدم ادوات تحليل المستهلك الاونلاين ف انك ترشح له منتجات متخصصه اوي
    افضل مثال هنا تاني هو موقع أمازونمثال تاني: تخيل لو فيه موقع بيبيع حفاضات اطفال .. بامبرز يعني
    ممكن يعرض انواع صعب انك تلاقيه ف المحلات العادية مثل بامبرز خاص بحمام السباحة والبحر … بامبرز للبشرة الحساسة اوي … إلخ….

انت بقى تستفاد من ده في شركتك ازاي؟ 👌

  • ببساطه ممكن تعمل عرض مبدئي Entry level offer
    يجيب لك ناس كتيير … ده مش منتج متخصص .. ده منتج مشهور وانت عامل عليه عرض كويس (عرض كويس مش معناه سعر أرخص بالمناسبة)
    مثال: عروض كارفور … على المنتجات الأكل الأساسية
  • وبعدين لما العميل يدخل هيلاقي المنتجات بتاعتك اللي ف Long Tail
    هيشتري منها ويعوض ربحيتك اللي قلت في العرض اللي فات ده
    مثال: في كارفور هتلاقي منتجات صعب تلاقيها بره … او هتلاقيها ف حتت بعيدة عنك ….
    فالعميل وهو جوة بيتشري المنتجات الاساسية لبيته … هيتكعبل ف المنتجات دي وهيشتريها 💰

    بس يا سيدي ودي كانت حكايتي مع البطيخ الاصفر 👆

و إضغط هنا لو عايز تقرأ #حواديت_في_البيزنس أكتر
و تابع بقية مقالات المدونه

Published on: أغسطس 9, 2018 - By: Taher Abdel-Hameed

Related Posts

يا ترى العميل بيشتري ايه بالظبط؟ حكاية صديقي و مطعم خرافي

إقرأ افضل مقالات البيزنس و التسويق تم نشرها هنا في 2020

كيف تنافس الشركات الكبيرة أو المسيطره على السوق بطريقة ذكية و فعاله؟

خاطره عن خبر: جروبات الياهوو رسميا ماتت خلاص

>