• Home
  • Blog
  • Resources
  • كيف تحمل كتب مجانا من بنك المعرفه المصري! دليلك الشامل للإستفاده من الكنز المستخبي ده

كيف تحمل كتب مجانا من بنك المعرفه المصري! دليلك الشامل للإستفاده من الكنز المستخبي ده

إزاي وفرت اكتر من 600 دولار عن طريق بنك المعرفه المصري! دليلك الشامل للإستفاده من الكنز المستخبي ده …
ايه الحكاية؟ بنك المعرفه المصري؟

المشهد الاول

من كام سنه سمعته عنهم في احد المعارض … و قالولي دي منصة عليها ابحاث وكتب ف كل المجالات مفتوحه مجانا للمصريين!
قولت في نفسي هتلاقيها ابحاث و كتب أكاديمية بس و بعيده عن البيزنس تماما … و مش بعيد تكون كتب من العصر الحجري!
دخلت اجرب اعمل حساب عليها …. احترت شويه هل اعمل حساب “باحث” و لا “قارئ” و هل يقصد بباحث هنا الاكاديمي فقط ولا كمان ابحاث السوق! المهم نسيت ادخل تاني!

المشهد التاني

عدت سنه … وشوفتهم في نفس المعرض … بس واخدين جناج كبير مع الناشيرين كمان اللي متعاقدين معاهم … عديت ع كل ناشر و اتكلمت معاهم … كلهم اجمعوا انه مشروع قومي رائع مفيش زيه ف العالم بالنطاق الكبير ده .. ومن دوله مش غنية …انت ازاي كمصري مدخلتش عليه لحد دلوقتي؟!
قولت في نفسي ما هو لازم تقولو كده … عشان لهفين شويه فلوس حلوه من الحكومه! ف شويه كتب قديمه و شويه ابحاث عفا عليها الزمن!

المشهد الثالث

من كام شهر قابلت صديق … و وسط الكلام ضربت له مثل ع لهف الناشرين العالميين فلوس من الحكومه ف مشروع بنك المعرفه … بدون إقبال عليه من الناس … وسئالته هل تعرف حد بيدخل عليه؟ وهل مفيد له؟
فوجئت برده عليا …. انه بيستخدمه ديما … وعليه كتب حديثه جدا و ف مجالات مختلفه بما فيهم البيزنس و التسويق وانه المرجع الأساسي له في رحله التعلم بتاعته!

المشهد الرابع

اشتركت …. انبهرت بجد … وفرت اكتر من 600 دولار في كتب انا محتاجه فعلا في مجالي …
خدتها ببلاش عشان انا “مصري”
ايوه انت قريتها صح … عشان مصري …. تخيل تدخل ع مواقع الناشرين الكبار …. يقولك انت مفتوح ليك الكتاب ده من بنك المعرفه المصري

خليني اقولك شويه من الكتب اللي جبتها

عشان تعرف انها كتب عمليه و حديثه كمان … و فيه ع المنصه اصدارات ٢٠١٨ و ٢٠١٩!

  • Marketing Management: The Big Picture
  • Creating Market Insight: How firms create value from market understanding
  • Customer Centric Marketing
  • Neuromarketing Exploring the Brain of the Consumer
  • Advanced Brand Management Managing Brands in a Changing World
  • Agile Marketing
  • Behavioral Marketing
  • Business Analytics for Sales and Marketing Managers
  • Customer Genius; Peter Fisk (most of his books available on EKB platform)
  • Inbound Marketing;
    وده احد المؤلفين مؤسس شركة HubSpot الرائعه
  • Data-driven marketing : the 15 metrics everyone in marketing should know; by Mark Jeffery.
    وده من وجهة نظري من افضل الكتب اللي اتكتبت ف التسويق ف العشر سنين اللي فاتت …قريته من كام سنه نسخه غير شرعية … لأني كنت مستنيه ينزل ع كيندل عشان اشتريه بس كانت النسخة الإلكترونيه كانت متاحة ف دول معينة مش من ضمنها مصر … كنت حاسس بتأنيب الضمير لانه من الكتب الرائعه اللي استفدت منها ومش عارف ادي المؤلف حقه …دلوقتي ضمير استريح شوية لإني كمصري حصلت ع نسخة شرعية مجانا. لو عايز تفهم يعني ايه نسخه شرعية هنا … يعني بإذن المؤلف و الناشر مش زي سرقه الكتب المنتشرة ع مواقع التحميل
  • Market Segmentation How to do it and how to profit from it, by Malcolm McDonald
    وده كنت خدت كورس اونلاين مع الرجل الكبارة ده مالكوم ماكدونلاد من كام سنه …  وكان كل شويه يشجنا اننا نرجع للكتاب ده … انا مش بس لقيت الكتاب ده … ده كمان لقيت أغلب كتبه مجانا
  • Marketing 3.0 From Products to Customers to the Human Spirit, by Philip Kotler
    للمؤلف الغني عن التعريف كوتلر … اللي تقريبا كل اللي درس اي حاجه ف التسويق يعرفه

موجود برضو شوية كتب من سلسله For Dummies الرائعه للناشر Wiley نزلت منها

  • PMP Certification All‐in‐One for Dummies
  • Excel VBA Programming For Dummies
  • Digital Photography for Dummies, 6th Edition

كتب باللغة العربية:

وكمان لقيت كتب باللغه العربية من ناشرين عرب زي العكبيكان و غيره لقيت كتب مثل:

  • التسويق لأصحاب الشركات الصغيرة والأعمال الحرة: كيف تسوق عملك بنجاح وبأقل كلفة ممكنة وبفعالية واحتراف
  • بحث التسويق الكمي
  • أسرار التسويق 49 سرا ناجحا لتنمية المبيعات

ها شوفت أسماء الكتب؟ لمعت عنيك؟ عجبتك؟

تعالى نشوف تحصل عليها مجانا إزاي …
اولا تدخل تعمل حساب مجاني على الموقع من هنا
وهيطلب من رقم البطاقه الشخصيه بتاعتك
اعمل حساب قارئ Reader
لو لسه محتار بين الخيارات
بيجيلك أيميل فيه الباسورد المؤقت بتاعتك … وبعد كده تغيرها
بس كده … اتفتح لك الكنز

تدور و تبحث إزاي ؟

لو انت مهتم بالبيزنس و التسويق (وأكيد ايوه طبعا عشان كده موجود ع صفحنتنا دي) يبقى خد الخلاصه دي
دول أكتر ناشرين عندهم كتب في البيزنس و التسويق ع المنصه .. باقي الناشرين حاجات قليله جدا تكاد تكون منعدمه

  • Wiley
  • SpringerNature وكل الناشريين اللي تبعها (Palgrave Macmillan – Apress – SpringerLink)
  • SAGE
  • العبيكان (لو عايز كتب عربية او مترجمه)

عشان تبحث على كتب في بنك المعرفه المصري عندك طريقتين:

  1.  عن طريق منصة بنك المعرفه نفسها
    ودي فيها نوعين من ادوات البحث
     أداه اسمها Iknito  و اداه البحث التانيه ع المنصه اسمها Muse و هي دي الأداه الأساسيه ع المنصه
    و الأداتين دول بيسمحوا انك تبحث بإسم الكتاب مثلا او بنوعية الكتب في مجال معين او بإسم المؤلف ….إلخ
  2. عن طريق صفحة المصادر
    ومن هناك اختار ناشر معين و شوف المنتجات/الخدمات اللي المنصة مشتركه عليها
    وادخل ع موقع الناشر … ودور هناك براحتك
    ميزة الطريقه دي … ان مواقع الناشرين عليها تصنيفات أدق … وبحث اسهل بكتير وكمان بحث ب ترقيم الكتاب الدولي ISBN

عشان كده سهلت عليك الطريق ف ان قولتلك على الناشرين اللي فوق دول لمجال البيزنس و التسويق
مثلا لما تدوس ع Wiley هتلاقي ف الخيارات Wiley Online Books
ودي اكتر من 16 ألف كتاب ف مجالات مختلفه .. منهم كتب عملية جدا و كتب أكاديميه
Wiley e-Text Books
ودي كتب حديثه … أكاديميه للدراسه المواد المختلفه
ودي بقى مفاجأه للطلبه …خصوصا في الجامعات اللي كتبها بالإنجليزي من بره مصر … وشراء الكتاب من الجامعه اختياري …
كان زمان بالنسبه لينا إجباري تشتري الكتب من الجامعه …مش عارف ايه الوضع دلوقتي
المهم انك ممكن تحصل ع احدث الكتب الدراسيه و المراجع
Recent textbooks from Wiley
مجانا من خلالها …. ودي هتوفر مبلغ محترم جدا ليك طبعا


أسئلة ممكن تيجي في بالك:

▉ ايه الفرق بين نسخ الكتب دي … و النسخ الموجوده ع مواقع التحميل المختلفه؟

 تقريبا نفس المحتوى و نفس شكل الكتاب
بس فرق السما و الأرض بينهم ..
انت هنا بتاخد الكتاب بطريقة شرعية بإذن المؤلف و الناشر … أما مواقع التحميل المنتشره دي … ربنا يسترها علينا في الأخره عشان دي سرقه علني لمجهود المؤلف و الناشر…
فالفرق بجد كأنك بتاكل حاجه حلال و حاجه حرام (وجهة نظر شخصية جدا)

▉ هو ينفع انا كمصري انزل الكتب دي PDF  واحطها ع موقع مصري تاني … يسمح للمصرين بتنزيل الكتب مجانا و بدون تسجيل؟ او ابعتها ع جروبات مصريه؟

انت كده ممكن تبوظ المشروع كله و تأذي كل المستفيدين …
تخيل انت مشروع بالضخامه دي … مع الوقت المفروض القائيمين عليه يقيموا المشروع …. وايه الحاجات المستخدمه و ايه الحاجات الغير مستخدمه …. لو عدد قليل مثلا استخدم تخصص معين او ناشر معين لكذا سنه … احتمال كبير يلغي التعاقد معاه ..صح؟
طب تخيل بقى انك بتقلل عدد الناس اللي بيدخلوا أصلا ع المنصه! ممكن المشروع نفسه مع الوقت يتلغي!

▉ طب انا عايز افيد الناس بكتاب تحفه شوفته ع المنص؟

قول للناس تسجل و تحصل عليه … او ابعت اللينك بتاعه للناس عشان تسجل وتحصل عليه …
او ابعت للناس الترقيم الدول للكتاب و اسمه وهم يدورا عليه
وبكده انت بتفيد الناس أكتر …. لأنك علمته يصيد السمك بنفسه بدل ما تديها له
وكمان بتفيد المنصه … وبتشجع القائيمين عليها انهم يتعاقدوا مع ناشرين أكتر و أكتر شارك البوست ده 🙂

▉ هل مسموح انزل نسخة من الكتب ع الجهاز عندك؟

دي بقى ع حسب الناشر طبعا … طرق قراءة الكتب متعدده ع المنصه:
– ممكن يسمح ليك ان تنزل الكتاب كله PDF or ePub
– ممكن يسمح ليك ان تنزل كل فصل لوحده ك PDF
– ممكن يسمح لك بالقراءه النص اونلاين فقط … او من خلال المنصه بتاعة الناشر فقط

▉ أنا مستريح بتنزيل الكتب من مواقع التحميل …. ومش فارق معايا احساس انه سرقه للمؤلف و الناشر؟ ليه أسجل ف المنصه دي؟

خليني اصدمك قدام نفسك …. كام كتاب قريته من الكتب الللي انت نزلتها قبل كده؟!
أكيد نزلت مئات الكتب …. فكر بقى كام كتاب قريته؟!
في الأغلب هتلاقي انك قريت قليل جدا …. و أكتر الكتب اللي كنت حريص على قرائتها هي الكتب اللي انت دفعت فيها فلوس او طلع عينك عشان تجيبها
طب طالما انت مش هتقراها .. وبتكوم كتب وخلاص … طب ما تدخل تجيبها بطريقه شرعية؟
ده غير انك طبعا بتدعم (و بتسغل في نفس الوقت) أكبر مشروع قومي في مصر للعلم

▉ هل المنصه عليها مقالات و و دوريات بحثية Journals ؟

المنصه مليانه ابحاث أكتر من الكتب …بس متكلمتش عنها عشان جمهورها غالبا عارف بنك المعرفه اصلا
وعشان انا شخصيا مهتم بالكتب أكتر من الأبحاث P:

▉ هل عليه كل التخصصات؟

خليني اقولك جرب تبحث مش هتخسر حاجه
انا شوفت عليها تخصصات دقيقة ف الهندسه و تحليل البيانات الضخمه مثلا …. وتخصصات ممكن تشوفها عامه زي الطبح و التغذية و الرجيم
وعليها قسم خاص للطلبه ف الجانعات و ماقبل الجامعات
وكمان عليها قسم خاص لصغار السن …. بمواد تعليميه لطيفة من سن الحضانه

▉ كلمة أخيره للقائمين ع المشروع

شكرا بجد ع المشروع العظيم ده
و يا سلام لو تضيفو الناشرين دول .. يبقى عملتو اللي عليكم و زياده شويتين
Pearson
Prentice Hall
McGraw-Hill
و بكده أغلب كتب البيزنس و أغلب التخصصات الأخرى في الجامعات و الدراسات العليا هيلاقوا كل اللي هم عايزينه. و بالمناسبه أغلب كتب جامعات مصر (اللي بتستخدم كتب اجنبية) من الناشرين دول

حاجة تانيه
يا سلام لو تعملو خيار
Add to my Shelf / Favorite /
or Create Book Lists
ممكن تكون في خيارات نتائج البحث
او بانر بسيط فوق كل مواقع الناشرين في شوية خيارات من ضمنهم كده …..

 أتمنى يكون البوست مفيد بالنسبه ليك …. شاركه مع اصدقائك عشان ننشر الخير ده

ملحقات:

  • فيديوهات عن المنصه:

الشرح التفصيلي لبوابات موقع بنك المعرفة المصري

قناتهم ع اليوتيوب …. عليها فيديوها تشرح المنصه أكتر

Published on: January 22, 2020 - By: Taher Abdel-Hameed

Related Posts

المساعد الشخصي في التسويق – أهلا بـــ Automation Tools

المساعد الشخصي في التسويق – أهلا بـــ Automation Tools

سبعة مواقع لتحميل كتب جديدة في البيزنس و التسويق مجانا وبشكل شرعي

سبعة مواقع لتحميل كتب جديدة في البيزنس و التسويق مجانا وبشكل شرعي

إنفوجراف: 18 كتاب روعة في البيزنس و التسويق

إنفوجراف: 18 كتاب روعة في البيزنس و التسويق

كيف تحضر ندوات و إجتماعات رجال الأعمال في مصر مجانا من الغرفة التجارية الأمريكية

كيف تحضر ندوات و إجتماعات رجال الأعمال في مصر مجانا من الغرفة التجارية الأمريكية
>