fbpx

تقليد منتجات الشركات و Me too Business

من الحاجات اللي بتضايقني كأحد العاملين في مجال التسويق … انك تشوف شركه تسرق حاجه من منافس (محلي او دولي) عيني عينك
و بدون رقابه من اي جهه!
اي الحكايه…. كتيره جدا خلينا نحكي شوية امثله في بالي دلوقتي:

▉ المثال الأول

اللي في الصوره دي شركه شحن اسمها سمسا SMSA
…. واخده نفس ألوان لوجو شركة فيدكس العالمية Fedex و اللي ليها تواجد اصلا ف مصر …
ولما دورت على أصلها … لقيتها بدأت ف السعوديه …. و فيدكس موجودة ايضا هناك

▉ المثال التاني

منتجات استهلاكيه كتيير … بتقلد الكبير ف السوق بنفس الوان الكيس ..بنفس التصميم تقريبا … و أسم قريب جدا …
خد عندك مثال زي اللي في الصوره … مارشملو بكيس بنفسجي MELLO
 تبع شركة “ايجيبت تريد” (ودي شركه ليها خبره كبيره جدا و منتجات كتيره وتبع جروب معروف ف المنتجات الإستهلاكيه في مصر)
 … تقليد للمنتج المستورد (المنتشر ف مصر برضو) HARIBO
بنفس الألوان و التصميم! عيني عينك!

مع انه في حته المارشملو دي … كان ينفع يعمل فيها “براند” مصري قوي وياكل السوق فعلا …. خصوصا بعد تعويم الجنيه و سعر المستورد بقى عالي اوي

▉ المثال الثالت

صاحب شركة ياخد نفس روح تصميم موقع المنافس بالظبط .. مش بس كده … نفس المحتوى عن المنتجات كمان !

▉ المثال الرابع على نطاق شركات المشاريع الصغيرة…

يا ترى خدت بالك من كم محلات العطور اللي ف كذا منطقة ف مصر و بتقلد محلات “ماء الدهب”
 بالديكور الاسود و طريقة كتابة اللوجو ….يعني لو مركزتش فعلا ممكن تعتبره فرع ل “ماء الدهب”
 المأساة انك تلاقي بعض مالكي هذه المحلات من المتدينين

▉ المثال الخامس : (مختلف شوية ) عن اوريو و بوريو

من سنين بوريو كان بيلعب لوحده (تقريبا) ف حتة بسكويت الكاكاو بالكريمه ف مصر …
هو تقدر تقول تقليد ( اقتباس ) من فكرة اوريو… اللي كان لسه مدخلش مصر ساعتها …
تمام مفيش مشكله فا هنا اقتبست فكره من بلد تانيه و طبقها في عدم وجود المنتج الأصلي! بروح مختلفة … ألوان مختلفه … لو الاتنين ع الرف فيه فرق واضح بينهم ….
لما  اوريو دخل مصر مع شركه Mondelez International
بعد فتره اشتروا بوريو
وبقة الاتنين تبع شركة واحدة دلوقتي
و مؤخرا الشركة دي بتحاول تزق بوريو ناحية البسكويت الساده كمان
خلاصة المثال ده ….
بوريو تقليد لفكرة بره … لما جات الشركة نفسها تم الاستحواذ عليها مع انها تقليد … تفتكر ليه؟ شاركني ارئك ف التعليقات


▉ في بالي كذا سؤال الصراحه:

فين جهات تسجيل العلامات التجارية؟ فين الرقابه؟
يا ترى ده حلال ولا حرام؟ سرقه؟ انا شخصيا بعتبره سرقه صريحه
ليه تبني البيزنس بتاعك ع تعب غيرك بالشكل الفظ ده!
ترضى ان حد ياخد تعب السنين منك كده!
.
طب هو ايه التعب….انت مأفور الموضوع!
شركات صرفت كتيير عشان تتعرف بألوان معينه و لوجو معين وتتعرف وسط المستهلكين
.اه طبعا مهم اوى تشوف المنافسين و تجاربهم …. تتعلم منها … تستلهم منها … تقتبس …لكن تاخد “كوبي باست” ! ياراجل عيب!

▉ هل استخدام نفس الالوان او طريقه الكتابه حكر على اول من استخدمها! دي الوان!

  • لا طبعا … بس انت لما بتستخدمها بنفس الطريقة مع منتج شبيه كمان ….اول حد بتضره هو نفسك:
  • انت بتقلد .. هتفضل دي فكرة العميل عنك
  • انت بتسرق مجهود غيرك
  • اه حكر (ضمنيا و اخلاقيا) ع الاستخدام ف نفس المجال ف نفس البلد
  • طب هو لوحات الرسم ايه غير شوية الوان فوق بعض!

▉ بيزنس “زي زي غيري” Me too business

الحقيقة ان فيه استشاريين و رجال أعمال مش بيحبوا النوع ده من البيزنس. وبيعتبروه وحش و كخه!
انا بشوف وجهه نظر تانيه
ايه المشكله ان تبقى Me too business
مفيش فرق بينك وبين منافسك ف حاجه خالص
بتقدموا نفس الحاجه بالظبط …
و سهل اوي التبديل بينكم … “مفيش سوسن … طب خد سوسو” !
طالما ان السوق لسه فيه طلب و الشركات الحاليه (العرض) مش مكفيه السوق …
مش زي ما شوفنا زمان …. كل كام متر محل موبايل او سنترال …
بس ده مش معناه انك تقلد المنافس حتى ف اسمه و لونه و شكله!


ملحوظه مهمه جدا: مفيش مشكله انك تبقى كده (بيزنس زي زي غيري)…بس لازم تعرف انه ده مش احسن موقف تحط فيه البيزنس بتاعك… يعني فيه حاجات كتييره ممكن تتميز بيها و سهله و بتفرق مع العملاء زي ما هنحكي قريب عن امثله لكده و هتعجبك جدا…
Competitive Advantage or Unique Selling Proposition.

اه طبعا عارف عشاق الـ Branding

مش هيعجبهم الحته اللي فاتت دي
بيحبو جدا انك تبقى مختلف و بيحلموا بعمل براند يضاهي العلامات التجارية الكبيره …
كل ده حلو يا صديقي  … بس ده عطل كتير من الشركات الصغيرة والمتوسطة انها تعمل تسويق بجد …
خلى فكرتهم عن التسويق انها اعلانات “براندج” و صرف فلوس ف الهوا (بدون قياس المردود)


◀ تستفاد انت ايه من الكلام ده:

  • اوعى تقلد تقليد اعمى لمنافسك خصوصا ف اللوجو و الاسم حتى لو مش موجود في بلدك
  • استلهم افكار … شوف الدنيا فيها ايه … بلاش تعيد اختراع العجله!
  • لو عايز تنافس منتج غالي (مستورد مثلا) … بلاش تقلد التغليف/الشكل … شوف ممكن تلعب ع ايه تاني غير تقليد الشكل … فكر هتلاقي مليون حاجه
  • كسمتهلك، بلاش تشتري منتجات متقلده بالشكل الفظ ده! انت كده بتشجعه اكتر! لأن غالبا بتبقى سيئه جدا خصوصا لو أكل…
  • الافضل انك تتميز بحاجه … لو مفيش (اكيد فيه ع الاقل طريقه تقديم الخدمة)… يبقى ركز ف تغطية الطلب ف السوق …. مفيش طلب… اطلع من البيزنس ده لو عايز تكبر ….


شاركني بتعلقاتك ايه الأمثلة اللي استفزتك من تقليد المنتجات؟!

Published on: March 28, 2020 - By: Taher Abdel-Hameed

Related Posts

ليه ماكدونالدز لسه بيعمل إعلانات في الشوارع

ليه ماكدونالدز لسه بيعمل إعلانات في الشوارع

أقولك سر؟ أنا اطردت من شغلي في التسويق

أقولك سر؟ أنا اطردت من شغلي في التسويق

حكاية بياع الفريسكا اللي زود مبيعاته 10 اضعاف بحيلة تتدرس في التسويق

حكاية بياع الفريسكا اللي زود مبيعاته 10 اضعاف بحيلة تتدرس في التسويق

خطأ في صفحات البيع Sales Pages بيضيع منك العملاء والفرص! وكيف تصلحه؟

خطأ في صفحات البيع Sales Pages بيضيع منك العملاء والفرص! وكيف تصلحه؟
>