• Home
  • Blog
  • Marketing
  • حكاية بياع الفريسكا اللي زود مبيعاته 10 اضعاف بحيلة تتدرس في التسويق
حكاية بياع الفريسكا اللي زود مبيعاته 10 اضعاف بحيلة تتدرس في التسويق - Taher Abdel-Hameed

حكاية بياع الفريسكا اللي زود مبيعاته 10 اضعاف بحيلة تتدرس في التسويق

من فتره كنت على البحر ولفت نظري بياع الفريسكا،
يااااااه وحشتني الفريسكا … اترددت عشان قلق الكورونا أني اشتريها …لكن حبي لفريسكا غلبني!

سألته بكام الفريكسا…. قالي الكيس فيه 5 شرائح فريسكا ب 30 جنية والعلبة فيها 5 قطع ب 30 جنية

لو من خارج مصر ومتعرفش الفريسكا؟ دي سناكس (اكله خفيفه) بتتباع على البحر عبارة عن شرائح بسكويت ويفر رقيقه وحشو معين.

انا استغربت لان ديما الفريسكا بتتباع بالقطعة … فموضوع ان الكيس على بعضه ده جديدة شوية!
سألته …قالي عشان الكورونا، فالفريسكا بتيجي متغلفه من المصنع بالشكل ده … وورني الاشكال والانواع!

قولت له طب انا عايز كيس من ده … وعلبة مشكلة من الأنواع كذا .. كذا …
قالي للأسف العلب كل نوع لوحده! فمش هينفع افتح ليك علبه واديك منها عشان ممنوع ألمس حاجة بإيدي!

أنا في بالي قال يعني متغلفه تغليف مصنع أوي!
هات ياسيدي علبة سمسم وكيس فريسكا عادي
كام 60 ج!

تاني يوم جبت منه نوع تالت ب 30 جنية …
كده يبقى انا شاري فريسكا ب 90 جنية في يومين!
رغم اني زمان كنت بجرب كل أنواع الفريسكا الموجوده عنده …بالقطعه ب 6 جنية فبجيب 5 أنواع ب 30 جنية بس!

القصة لحد هنا ومفهاش حاجه اوي… وانا باكل وقربت اخلص الفريسكا (واضح من الصورة) … سرحت كده وفكرت هو ايه اللي الشخص ده عمله!

طلع عمل طريقة من اهم الطرق لتزويد مبيعاتك خلال فترات الركود!

تعال نشوف عمل ايه؟

مش هقولك انه طمن زبونه القلقان من كورونا بإن المنتج لم يلمسه ايد وإن التغليف كويس … (هنعديها لانها الحاجات دي مش من مصنع بالمعنى الحرفي للكلمة!)

لكن في طريقة تسعير العلبة Package …. يكمن كل السر والأرقام

هو زود متوسط سعر الطلب Average Order Value من حوالي قطعتين ب 12 ج ل على الأقل 30 ج
ولو حد حب يجرب أكتر من نوع فهيشتري على الأقل ب 60 ج عشان يدوق طعمين بس!

وده رقم مهم جدا بالمناسبة تقيسه في مرحلة البيع Conversion ودي مرحلة بنركز عليها جدا في كورس Marketing GPS

بشكل عام انت عشان تزود مبيعاتك تعمل حاجة من دول:

  1. يا ترخص سعر منتجك وتبيعه لناس أكتر!
  2. يا تحافظ على نفس السعر وتحافظ على وصولك لنفس الناس!
  3. يا تزود سعر بيع منتجك وتبيعه لناس أقل!

العبقري بتاع الفريسكا ده خلال أزمة كورونا لاحظ ان اعداد الناس قلت …. واللي بيجي بيقلل اكله من بره شوية … او عنده تخوف بشكل خاص من اللي بيبيع اكل سايب كده!

السؤال بقى ….يتبع بقى انهي طريقة؟!

كده اول طريقتين من اللي فوق مش هينفعوا دلوقتي!
والطريقه التالته (تزود سعر بيع منتجك وتبيعه لناس أقل) مش هتنفع برضو عشان سعر المنتج معروف انه رخيص!

الحل يبقى في انه يزود قيمة متوسط الطلب Average Order Value

بتغليف كل 5 مع بعض … كده هيضمن ان أقل حد هيشتري من عنده هيبقى ب 30 ج
وفي نفس الوقت طمنه على نظافة المنتج ….وبكده هيكون قدر يعوض المبيعات اللي كان بيبيعها أيام زحمة الناس قبل كورونا … بالبيع لناس اقل بكيتر بس مكسب احسن.

شوفت الروعه؟ الحقيقة كان نفسي اصور ليك الرجل ده والعلب نفسها وهي مليانه …. بس الخاطرة دي جت لي بعد ما نسفت اغلب الفريسكا!

تحديث: هيخسر عملاء كتير!

من التعليقات على المقال على الفيسبوك أحد القراء علق وقال “هيخسر عملاء كتير”

رديت عليه وقولت
حسب انت عايز تشوفها ازاي؟!
مثال
يكسب 1000 جنية من 100 عميل ؟
ولا يكسب هي هي 1000 ج بس من 33 عميل؟
خصوصا ان الاعداد اصلا بقت اقل من الاول (في القرية السياحية اللي فوق دي)
وبالمناسبة في حالة زي منتج الفريسكا … الصفقة من النوع اللي
Transactional Sale
يعني بيعة مره والسلام …. كبيرك هتشوفه وتشتري في اسبوع اجازة المصيف مرتين تلاته مثلا!
عكس بيعات تانية …. طويلة المدى .. ممكن تخسر فيها عشان تستحوذ على العيمل …. وتكسب منه بعد اول بيعه …….

انت كمان تقدر تزود مبيعاتك من خلال نظام تسويق كامل وواضح ليك مع كل مرحلة من رحلة العميل معاك ... من خلال كورس التسويق العملي جدا Marketing GPS  تقدر تعرف تفاصيله من هنا

Published on: August 8, 2021 - By: Taher Abdel-Hameed

Related Posts

حكاية الشركة اللي شقلبت صناعة السيرك و عملت منه بيزنس مربح جدا Blue Ocean Strategy!

حكاية الشركة اللي شقلبت صناعة السيرك و عملت منه بيزنس مربح جدا Blue Ocean Strategy!

تعمل ايه لو السوق نايم في موسم معين؟

تعمل ايه لو السوق نايم في موسم معين؟

غلطة ضيغت من عمري سنين في التسويق

غلطة ضيغت من عمري سنين في التسويق

حكاية أفضل استثمار عملته في البيزنس بتاعي! حاجة غير اللي في بالك تماما!

حكاية أفضل استثمار عملته في البيزنس بتاعي! حاجة غير اللي في بالك تماما!
>