fbpx
  • Home
  • Blog
  • Marketing
  • أقولك سر؟ أنا اطردت من شغلي في التسويق
أقولك سر؟ أنا اطردت من شغلي في التسويق

أقولك سر؟ أنا اطردت من شغلي في التسويق

أقولك على سر لا يعرفه أحد عني قبل كده؟ حتى عيلتي! أنا اطردت من شغلي في التسويق!
بسبب ………. 
مش بس كده ده مديري اللي طردني كان سبب في انه يزود مرتبي بنسبة 50% أكتر بعد ما طردني!
طب ازاي؟!
تعالى نعرف الحكاية والدروس المستفادة منها!

خليني قبل ما اعرفك ازاي اطردت من الشغل … ما تيجي الأول اقولك ازاي اتعينت أصلا في الشركة دي؟! مش كده ولا ايه؟!

في اواخر سنة 2011 كان بقالي سنتين شغال في المبيعات للشركات B2B وكنت مخطط بأن هم سنتين بس هشتغلهم في المبيعات عشان اتعلم مهارات معينه كانت نقصاني ساعتها وبعدها هشتغل Career Shift في قسم التسويق
جات الثورة والاحداث المتلاحقة في 2011….إلخ …  بس برضو ده الوقت اللي قدام نفسي لازم اشتغل في التسويق!
بدأت أدور على فرصة في التسويق … كان من ضمن الطرق اللي عملتها زمان هو أني ابعت السيرة الذاتية Resume بتاعتي لمعارفي اللي كونتهم في البيزنس واللي كنت محافظ على علاقتي بيهم بصدق ….

كان من ضمنهم صاحب شركة سوفتوير اتقابلنا في مقابلة عمل interview قديمة من سنتين لوظيفة في المبيعات وكنت اتقبلت بس حصل ظروف عندهم اخرت التعيين كتير… لحد ما جات فرصه تانية ليا …عموما انا كنت محافظ على علاقته بيه … وعلى مراسلات من وقت للتاني (درس #1)
اول ما شاف السيرة الذاتية واني بدور على فرصة في التسويق مش في المبيعات…قالي طاهر انا عايز اقابلك!

وجاء وقت المقابلة Interview

لم يكن Interview بالمعنى التقليدي … تقدر تقول ده كان اجتماع تفاهم واتفاق بين الطرفين….
قالي أنا هأسس قسم التسويق عندي في الشركة.. وعارف إنك فاهم تسويق ودرسته في الكلية … ومعندكش خبرة عملية فيه
وعشان كده هنشتغل مع بعض ونجيب كتاب كوتلر ونمشي واحده …واحده على الخطوات (بالمناسبة أنا حضرت تدريب لفيليب كوتلر شخصيا لما جه مصر بعدين في 2012) ….
ايه رأيك يا طاهر؟
الحقيقة كان عرض لا يترفض اطلاقا خصوصا كمان ان المرتب كان أحسن من اللي كنت باخده
وكنت في الفترة دي بدون عمل لأن شركتي القديمة قفلت وصفت شغلها بسبب حاجات كتير من ضمنها ظروف البلد ساعتها أصلا! … وكنت اخر موظف يمشي منها قبل المدير العام (درس # 2) هنتكلم عنها اكتر بعدين في مقالات تانية

في حماس وتوهان البدايات

المهم اتعينت واشتغلت معاه وانا مبسوط ومتحمس جدا … هشتغل بقى في التسويق!
اه صحيح زمايلي في الشغل كانوا فكريني قريب صاحب الشركة.. لأن الشغلانة دي مكنش معمول ليها اعلان او مخطط ليها أصلا (درس # 3) …. قعدت فترة عشان أقنعهم أنى والله كانت علاقة بيزنس عادية جدا … عشان يعرفوا يتكلموا عنه وحش (يشتموه يعني) قدامي براحتهم!

وكانوا بيسألوني هو انت شغال ايه او ايه المهام الوظيفية بتاعتك في التسويق …
كنت برغي في شوية حاجات …. أصل مفيش وظف وظيفي محدد Job Description ليا في الشركة! … مش بس كده ده صاحب الشركة لما سألته في لقاء التفاهم (اللي كان مفروض interview) عن المسمى الوظيفي (درس # 4) …  قالي انت حابب تسميه ايه يا طاهر …قولت له
Assistant Brand Manager
قالي بس ده كبير عليك دلوقتي (معلومة ليك صحيح المسمى ده أصلا مش موجود في شركات السوفتوير! … بس مشهور في صناعات تانية زي المنتجات الاستهلاكية FMCG ويعتبر اول منصب entry level في التسويق)
فقالي انت هتبقى Marketing Specialist ولما تترقى تبقى Assistant Brand Manager
حلو الكلام …قولت له تمام …

ايوه بقى محاولة الشغل وإني اطلع أي قماش!

لما جينا بقى للشغل الفعلي … صاحب الشركة كان مطحون في مقابلات العملاء والمبيعات ومقابلات الشركاء… ونسي خالص وعده معايا اننا هنمشي مع بعض على خطوات الكتاب!
قولت لنفسي مش هستناه طبعا …. جبت الكتاب معايا المكتب … ماهو عندي نسخة اصلية لأني درسته في الجامعة كويس (ايوه انا من المحظوظين اللي اشتغلوا في مجال دراستهم وطلع هو اللي حاجة اللي بحبها أصلا … هبقى احكي ليك بعدين ازاي عرفت ده من بدري كده! بس انت يبقى فكرني لو نسيت اقولك) …
وحبيت امشي على الكتاب خطوه خطوه (درس # 5)… وأطبق بقى!
انا فاهم كلام الكتاب كويس جدا …. مش بس كده ده انا خدت كورسات على الكتاب كمان بتشرح الكتاب بالأمثلة بتاعته (درس # 6)

الفصل الأول … التاني … التالت … الرابع… إلخ
انا فاهم كل اللي مكتوب بس مش عارف اطبق منين وابدأ منين؟!
قولت بسيطة خلينا اشوف ازاي اعمل خطة تسويقية …. Marketing Plan
نزلت نموذج للخطة بناء على بعض الكتب الأكاديمية textbooks المشهورة … وقول امشي خطوه خطوه
اول حاجة لقيتها ساعتها
Values – Mission – Vision – Business Objective  وغيرها من الكلام الجميل!

انا شخصيا مكنتش عارف أي حاجة منهم على مستوى الشركة عندي ولا موظفين الشركة القدام! … واشك ان حتى صاحب الشركة لم يكن يعرف برضو! …. (درس # 7) بالمناسبة اللي عرفته بعد كده إن ده عادي جدا في الشركات الصغيرة وحتى المتوسطة … وعايز اصدمك أكتر واقولك ان الحاجات دي ملهاش لزمة ع ارض الواقع! واللي بيعملها بطريقة الكتب دي بتطلع منه اكلشيهات محفوظة تنفع لأي شركة في العالم! استنى لما تقرأ الدرس المستفاد هنا عشان تعرف اكتر!

المهم جالي احباط … ومكملتش باقي النموذج والخطة …. وقولت لنفسي (وشجعني كلام زمايلي السلبي وما اكتره في شركاتنا العربية) أصل احنا شركة محلية local مش شركة متعددة الجنسيات multinational كل حاجة بخطة ومعمولها حساب …. وقعدت افتكر المقابلات interviews اللي عملتها في شركات عالمية زي بروكتر وجامبل P&G (اللي كان حلم حياتي وان بدرس تسويق في الجامعة اني اشتغل فيها) وغيرها من الشركات الجميلة اللي روحتها كطالب وظيفة Job Seeker وكمحترف مبيعات (مش قولت لك انا كنت شغال سنيتن في مبيعات B2B) (درس # 8)

المهم فضلت في حالة التوهان دي فتره وطاردت مديري (صاحب الشركة) عايز اقعد معاه ونحدد حاجات نعملها
وافق …. واداني شوية حاجات اعملها في تحليل المنافسين ومنتجاتهم… إلخ

بداية شغل ملموس

بعدها بفترة …. قالي طاهر عايزين نعمل 5 مواقع …لكل منتج من عندنا موقع … هتشتغل مع فلانه في المشروع ده … وعايزن نعمل كل حاجة من أول اللوجو …. لغاية البروشور والمحتوى …. إلخ

عنيا لمعت … أخيرا هشتغل على حاجات ملموسه …. روحت انا وزميلتي اشتغلنا وشوفنا مواقع المنافسين في المجال … وشوفنا نعمل ايه ولا نعمل ايه …. إلخ
اول نسخة أولية للموقع  اترفضت  …. التانيه اترفضت …. التالته  … اترفضت
قالنا بص يا طاهر ويا فلانه انا عايز موقع شبة ده بالظبط ….. قولت بس ده ….. قالي.. ايوه عارف عايزه شبة كده بالظبط!

عملنا موقعين … موقع الشركة وموقع اول منتج … ولوجهات المنتجات واعلانات في مجلات متخصصة (كان ساعتها لسه ليه وزن شوية) …. كنت فرحان بالشغل اللي بنعمله شكله حلو جدا … فيه أفكار وراء كل تصميم وإعلان ….
طب مبيعات المنتجات نفسها …ولا اعرف عنها أي حاجة …. ولا اعرف هل اللي عاملناه ده سمع في ارقام المبيعات ولا لاء ….
انا كنت بلعب في دايرة communication and branding  وصاحب الشركة والبيزنس بيتكلم لغة الأرقام والمبيعات وال ROI  عشان كده مكنش حاططنا في دايرة اهتمامه ولا وقته خالص! … (درس # 9)

إحساس غريب جوايا واجتماع أغرب!

كان جوايا إحساس إن فيه حاجة تانية تتعمل أحسن من كده!… بس كنا بنطلع شغل شكله حلو بإمكانيات متواضعة جدا داخل الشركة يخلينا فخورين بجد بنفسنا!
قعدنا مع بعض 6 شهور تقريبا ….. وصاحب الشركة طلب اننا نتقابل على غير العادة (درس # 10)
لقيت الاجتماع غريب … وعمال يلف ويدور …. وظروف البلد … والبيزنس …. والمبيعات قليلة …. وقسم التسويق لسه بيبدأ …وهو احتمال يسيب البلد ويهاجر…. إلخ ..
فهمت قصده …. فقولت في نفسي أسهل عليه الطريق …. قولت له ما معناه باختصار لو حابب تطردني من الشركة … عادي انا متفهم ده جدا …. ومستعد له بدون ما تحتاج تلف وتدور وتجمل الكلام…. الموضوع ابسط مما تتخيل معايا ومتقبله تماما!
لقيت ملامحه اتغيرت وفرح إني فاهم …وقعد يشكرني على سلوكي …. إلخ!

ايوه صفحة واتطوت خلاص!

سبت الشركة …. اسف قصدي اطردت منها … وانا مبسوط ومش حاسس بأي ظلم من ناحيته…. هو كان انسان رائع وانا برضو انسان رائع …لكن مسوق ناقصيني اعرف شوية حاجات في التسويق العملي! (درس # 11)

بدأت مرحلة البحث عن عمل تاني (درس # 12)…. والحمد الله بعد كام أسبوع ربنا رزقني بعرض عمل في شركة أكبر في صناعة تانية وأيضا في قسم التسويق…. والشركة كمان اجنبية بس بنكهة مصرية شويتين!
وفي مقابلة المرتب طلبت مرتب اكتر ب 50% من مرتبي اللي فات … أنا اه مطرود وبدون شغل بس ده لا يقلل من قيمتي في السوق! (درس # 13)
فهمت من قسم الموارد البشرية (كانوا متعاونين جدا) ان ده اعلى من ميزانيتهم للوظيفة دي….. بس هيشوفوا الموضوع ….
وفي اخر مقابلة كان مع مدير عام الشركة واللي كنت هشتغل معاه مباشرة في بعض المهام… كان أجنبي ….
 قالي انت كنت شغال في شركة كذا مع فلان الفلاني (مديري السابق اللي لسه طاردني)
قولت له اه …
قالي ده صاحبي وحبيبي وعملنا شغل مع بعض قبل كده!… تحب أكلمه وأسأله عليك النهارده؟ (درس # 14) ….
قولت له اه طبعا اتفضل!
قولت في نفسي …. وماله يسأل! انا بعمل اللي عليا …والباقي بتاع ربنا.

وكانت المفاجأة أتقبلت!

بعد كام يوم استلمت مكالمة من الموارد البشرية بأني اتقبلت وتعالي امضي العقد … ونبدأ امتى ….
واشتغلت بالفعل معاهم اسبوع واحد (درس # 15) واعتذرت وسبتهم لأسباب شخصية بحته (انا اللي سبتهم … انا اطردت مره واحد في حياتي… باقي كل الشركات اللي عملت فيها بفضل الله كانوا بيتحايلوا عليا retention plans وانا ماشي عشان استنى اكتر)
عرفت بعد كده انه سأل عليا بالفعل مديري السابق … وأنه شكر فيا جدا … واني شخص فاهم … وإلخ!
صدقني انا برضو قولت في نفسي زي ما انت بتقول دلوقتي كده…. أمال طردك ليه!

مكالمة غريبة ودعم غير متوقع

لقيت بعدها بكام يوم … مديري السابق (ايوه اللي طردني) بيكلمني … ويسلم عليا. وبيسألني اخباري ايه مع شركة كذا …
أنا استغربت انه عارف …
وقالي… أصل المدير العام صاحبي وكلمني وكان بيسألني عليك …. وسألني هو طاهر يستاهل مرتب كذا …. رديت ايوه واكتر! ووصيته عليك إنك شخص بتاع شغل وحابب تتعلم بجد…..

وكمل وسألني انت عامل ايه معاهم … مبسوط؟ قولت له هم ناس محترمه جدا بس سبتهم لأسباب شخصية ……..
قالي ربنا يوفقك في خطوتك الجايه يا طاهر …

لحد هنا والحكاية خلصت بس الدروس لسه مخلصتش!

اشتغلت واطردت ومديري اللي طردني بيشكر فيا وكان سبب ان مرتبي يزيد مع شركة بها صديق له رغم عدم وجود أي مصالح مشتركه ما بينا بعد كده!

وتعلمت دروس كتيرة كان صعب جدا إنى اتعلمها غير من القصة دي. اللي لو عاد بيا الزمن هختار أنى اعيدها بحذفيرها مع نفس الناس الرائعة اللي تعلمت منهم: مديرين وزملاء.

عشان تعرف أيه الدروس اللي في القصة دي وشرحها ليك…. ايوه اللي مكتوبه فوق بين قوسين شبة كده (درس # ..)

دخل اسمك وايميلك في الصندوق ده وهبعتها ليك مجانا على الايميل قريب لما أخلص كتابتها في شكل ملف PDF مع ربطه بسياق القصة اللي فوق دي عشان تفهمها اكتر!

خبر جميل ليك

مش بس كده عندي ليك خبر جميل انا عملت كورس أونلاين Marketing GPS طازه من كام اسبوع… دمجت فيه اهم ما تعلمته على مدار 12 سنة في التسويق بشكل عملي جدا …. اوعدك إنك مش هتلاقيه بالشكل ده والشمولية والبساطة دي… في أي حته تانية!

هتطلع من الكورس:

  • معاك نظام تسويقي متكامل… تمشي عليه سواء كنت موظف في التسويق او صاحب شركة صغيرة … هتعرف تجيب نتايج ملموسه على ارض الواقع! مش شغل شكله حلو بس ملهوش لزمه في الواقع!
  • الكورس مليان امثله من شغلي … لما جيت أعد الأمثلة طلعوا اكتر من 120 مثال عملي!
  • ده غير ان الكورس مليان في كل مرحلة ايه الأخطاء المشهورة في الخطوة دي وكيف تتجنبها من ضمنها حاجات وقعت انا فيها شخصيا ومديريني السابقين.

تقدر تشوف تفاصيل الكورس من هنا …  حاليا بسعر خاص جدا لفترة محدودة (ده كلام بجد!) بمناسبة الاطلاق …. يا تلحقه بقى يا ما تلحقهوش!

Published on: September 8, 2021 - By: Taher Abdel-Hameed

Related Posts

المنتج ده سيئ وتحت توقعاتي! – رحلة سريعة لفهم العميل

المنتج ده سيئ وتحت توقعاتي! – رحلة سريعة لفهم العميل

ليه ماكدونالدز لسه بيعمل إعلانات في الشوارع

ليه ماكدونالدز لسه بيعمل إعلانات في الشوارع

حكاية بياع الفريسكا اللي زود مبيعاته 10 اضعاف بحيلة تتدرس في التسويق

حكاية بياع الفريسكا اللي زود مبيعاته 10 اضعاف بحيلة تتدرس في التسويق

خطأ في صفحات البيع Sales Pages بيضيع منك العملاء والفرص! وكيف تصلحه؟

خطأ في صفحات البيع Sales Pages بيضيع منك العملاء والفرص! وكيف تصلحه؟
>