• Home
  • Blog
  • Entrepreneurship
  • الـ Time Machine موجوه فعلا! و كيف تستخدمها في التسويق ؟ مع أمثلة عملية

الـ Time Machine موجوه فعلا! و كيف تستخدمها في التسويق ؟ مع أمثلة عملية

كتير من الأفلام و القصص تخيلت وجود ألة الزمن
بس الخبر الجميل انها موجوده فعلا! … وكمان أنا بستخدمها في حاجات كتيرة اوي ف التسويق
ايه الحكاية؟
▉ موقع أرشيف الانترنت … موقع عالمي غير هادف للربح archive.org
عليه اداه رائعه جدا اسمها
Wayback Machine
دي يا سيدي تقدر تقول ألة زمن بترجعك للماضي بس … مفيش للمستقبل لسه 🙂
يعني تقدر من خلالها تشوف اي موقع كان شكله… محتواه عامل ازاي كذا سنه ورا ..

طب ايه المفيد في كده؟ او استفيد ازاي منها ف البيزنس؟

خليني احكيلك انا بستخدمها ازاي ؟ و استفدت منها ازاي؟

  • كتير من الإستشارات التسويقية اللي بعملها … بحتاج اعمل تحليل للمنافسين … و ادرس السوق ده ابعاد ايه…. احيانا محتاج اعرف المنافس ده امتى دخل السوق ده ؟ او امتى ابيتدى يشتغل/(و وقف شغل) ف المنتج ده؟
  • تطور رسائل المنافس …كان بيوصف نفسه زمان ازاي و دلوقتي ازاي؟
    وإستفسارات كتيره عشان تكمل الصورة ف التحليلات التسويقية ..

فجزء اساسي من التحليل طبعا انك تشوف مواقع المنافسين على اكتر من مرحله زمنية في الماضي

  • او اصلا انك تلاقي الشركه قفلت و الموقع كله راح!
  • او تلاقي حد قالك فكرة “استارت اب” … وتيجي تحلل المنافسين تلاقيهم كلهم قفلوا و بالتالي مش عارف كانوا شكلهم عامل ازاي … عشان تتفادي المطبات اللي وقعوا فيها خصوصا لو مطبات متعلقة بالسوق مش بالشركاء مثلا …
  • او تعمل ايه لو انت بتاخد رأي الناس في فكرة شركة ناشئة (استارت اب ) (او حتى هتزود منتج او خدمه اصافية عندك) .. قالولك دي كانت موجوده قبل كده … شركة كذا كانت عملاها! ومش عارف توصل لمعلومه عشان الموقع قفل!
    او ع الاقل عايز معلومه من موقع معين و ف وقت محدود عشان مشروع شغال عليه دلوقتي
    كتير بتصادف انه الموقع … تحت الصيانة دلوقتي … او الدومين راح … و انت عايز المعلومه بسرعه…
  • . تعمل ايه … لو عرفت بإن فكرة شركتك كانت موجودة قبل كده بس قفلوا؟ … و دورت ع موقعهم مبقاش موجود!
    وانت كنت عايز تذاكر التجربه دي عشان تتجنب اخطأهم؟ تعرف يا ترى كانوا بيستهدفو مين؟ كانوا شغالين مع مين؟ اي خيوط عشان تفيدك …بدل ما تبدأ من الصفر … تعالى للاداه المهمه دي
  • او كان فيه موقع زمان عليه محتوى مفيد بالنسبة لك … وقفل … وعايز تدخل تشوف المحتوى ده
    او انت شخصيا كان عندك موقع زمان … ومدفعتش مصاريف التجديد … وراح نسخة المحتوى الأحتياطي اللي كانت عندك … تقدر بالأداه دي تشوف المحتوى ده ..ع الاقل ممكن تلاقي اغلب النص … وبعض الصور D:

المهم تعمل ايه ف كل المواقف دي …..

تعالا يا صديقي للأداه دي …. و الحمد الله ما عمرها خيبت ظني
و استفدت منها كتيير ف شغلي
لدرجة ان ف الإستشارات بتبهر العملاء جدا …. بإنك بتجيب حاجات ع المنافسين السابقين هم نفسهم مكنوش يعرفوا عنها أي حاجه …
بالاداه دي … مع شوية بحث متقدم … قدرت اقوله ع شوية رؤى و استنتاجات مبدئية. Helpful Insight … انبهر جدا بيها عشان الوقت كان محدود

  • زي بلاش يستهدف الشريحه دي … كل اللي قفلو كانوا بيستهدفوا الشريحه دي … واضح مبدأيا إن الخزوق فيها … تعالى ندور اكتر ليه.
  • من الموقع القديم قدرت اروح للسوشيال ميديا بتاعتهم (لو لسه موجوده) و المواد التسويقية اللي عليه
  • مين المؤسسين اللي فاتوا …وكانت خبراتهم عاملة ازاي ساعتها ….. وراحوا فين دلوقتي …. ومنهم عرفنا انهم كانوا شباب كفاءة جدا …. يبقى السوق فيه خزوق معين خلاهم قفلو (ده ادى لينا طرف خيط مهم جدا)
  • تقدر تعرف لو الشركه اللي بتحللها عملت كام تحول ف خدمتها pivot وهل كملت فيه قد ايه؟ و منه تبدأ من حيث انتهى الأخرون … بلاش تعيد اختراع العجلة

شوقتك للأداه دي؟

عايز اقولك استخدام الاداه دي …. انت و خيالك بقى ف البيزنس و ع حسب الموضوع اللي بتدور عنه

يالا بينا ع الاداه …. من هنا: https://archive.org/web/.

طريقة الإستخدام:

ببساطه بتاخد اللينك (موقع او صفحه داخلية لموقع) و تحطها ف صندوق البحث اللي ف الموقع
وبععد كده تصفح اللقطات القديمة من الموقع الليانت عايزه ( كل دايره ع تاريخ معين يبقى موجود منها نسخة من أرشيفية)


حالات عملية عشان نستفيد و نجرب عمليا الأداه دي:

▉ عايز تعرف كريم اول ما بدأت كان شكلها عامل ازاي في 2013

كانت بس بتأجر سيارات أجره اونلاين وقارنها بدلوقتي …
https://web.archive.org/web/20130614050539/http://app.careem.com/about

▉ Zoboon

من اوئل الشركات (ع حد علمي) اللي عملت برامج الولاء للمستهلكين (B2C) ف مصر
كانت نشيطه جدا 2012 ل 2016 تقريبا
مينفعش تفتح شركه او تشتعل تسويق في شركة عروض او خصومات او برامج ولاء من غير ما تذاكر الشركه دي كويس … و تحلل تجربتها .ودي كان واحد صاحبي بيفتح شركه ف نفس الاتجاه ….. خدت معاه لفه ف الشركه دي
هتلاقي اسماء الشركات اللي كانت مشتركه .. لو بتفتح نفس شركة ف نفس المجال … بداية كويسة ف البحث التسويقي انك تسأل الشركات دي عن تجربتهم مع Zoboon …
https://web.archive.org/web/20130101000000*/Zoboon.com

▉ Dare in Deal

ياااااااااه فاكرها؟! …. تعمل ايه لو حابب تعرف كانت شغاله ازاي و ايه عروضها؟ ومين الشركات اللي اتعاملت معها
عشان بدل ما تبدأ من الصفر لو ده كان مجال شركتك؟
بالمناسبه … قصة توقف الشركه دي … المؤسس بتاعها حكاها بالتفصيل في بودكاست قبل كده …. لو حد مهتم يقولي واحط له اللينك ف التعليقات ..اتفضل خد لفه في تاريخها
https://web.archive.org/web/20120701000000*/http://www.darendeal.com/  

▉ مشتري دوت كوم

ده كان من المواقع الرائعه جدا ك محتوى ف نصائح الشراء …. كيف تشتري اي حاجه وتعرف الفرق بين الانواع المختلفة من المنتجات..
الموقع كان نشط من 2009 ل 2016
كان مصدر ربح الموقع ع ما اتذكر اعلانات جوجل
الحالة دي مهمه للدراسه للمواقع اللي طبيعة شغلها مبني ع المحتوى … لأن جودة المحتوى هنا كانت عالية ع ما اتذكر وكمان SEO تهيئه محركات البحث كانت عاليه (من اوائل المواقع اللي بتظهر في البحث) … يبقى في عوامل تانية خلتها ما تكملش… بدل ما تضيع عمرك ف بناء موقع مبني ع المحتوى العربي بجوده كويسه … حاول الاول تحلل ليه الشركه دي قفلت … يا ترى ربح قليل؟ يبقى تدور ع نموذج ربح بديل ؟ … ولا انفصال شركاء؟ …إلخ
خد لفه هنا https://web.archive.org/web/20100915000000*/http://www.moshtry.com/

▉ AWARENESS for Training and events

دي كانت من اكبر و اشهر شركات التدريب ف مصر …. كانوا بيجيبوا اشهر مدربين ف العالم لمصر
كانت نشطه بين 2005 ل 2011 … تقدر تشوف كانت بتجيب مين … واخر “ايفينت” ليها ايه ؟ لو مجالك شركات التدريب و”الإيفينتات”
https://web.archive.org/web/20100210182814/http://www.awarenessweb.com/

▉ عايز تعرف موقع ياهو كان عامل ازاي ع مر السنين:

من هنا تقدر تشوف كل دهhttps://web.archive.org/web/20190301000000*/Yahoo.com

▉ عايز تعرف هل عروض فترة الخصومات زي “البلاك فرايداي” حقيقية ولا اي كلام؟

من خلال الاداه اللي ف المقال ده تقدر تعرف كده .. إزاي؟
خد لينك المنتج نفسه و حطه على Wayback Machine
و ارجع في الماضي كده لشهر أو أكتر وشوف السعر أصلا كان كام اونلاين
الطريقة دي فعاله جدا على المواقع التجارة العالمية والمحلية و مواقع الخدمات الاونلاين.
تلميح: خد اللينك الدائم للمنتج بدون تفاصيل زيادة في اللينك (الحمله .. الافيليت…إلخ)

▉ عايز تعرف تطور سعر منتج معين ع مراحل زمنية مختلفه … شهور .. سنين..

نفس الكلام خد لينك المنتج وحطه في ألة الزمن دي وتقدر تتابع التغيرات دي.

◀ تعمل ايه دلوقتي:

1- شاركني برأيك عن الاداه دي هل مفيده ليك ولا لاء
2 هل في ادوات تانية بتستخدمها ف المواقف اللي زي كده؟ …. قولها ف التعليقات عشان كلنا نستفيد
3- لو عجبك “البوست” ده شاركه مع أصدقائك عشان يوصل لناس اكتر ..

Published on: November 20, 2019 - By: Taher Abdel-Hameed

Related Posts

يا ترى العميل بيشتري ايه بالظبط؟ حكاية صديقي و مطعم خرافي

إقرأ افضل مقالات البيزنس و التسويق تم نشرها هنا في 2020

سوق مصر من أعجب الأسواق فعلا! خلال أزمة كورونا

كيف تنافس الشركات الكبيرة أو المسيطره على السوق بطريقة ذكية و فعاله؟

>