في سنه ٢٠٠٧ قمت بتجربه غريبه و عجيبه..
وأنا بذاكر شفت نمله كبيره … جبتها وحطتيها ف برطمان شفاف و حطيت شوية سكر ف البرطمان …
وكل شويه أبص عليها … ألاقيها مش بتيجي ناحية السكر خالص و بتعدي من فوقية و رايحه جايه حوالين البرطمان بتدور ع مكان للخروج …
اغيب كام ساعه … نفس الكلام…
فضلت كده من العصر لحد السحور (كنا ف رمضان) … مفيش ملل و لا زهق ولا يأس!
احاول ألفت نظرها للسكر… مفيش … مش عايزه…
رايح جايه .. عايز تخرج!
فتحت البرطمان وسبتها تخرج … الأعجب انها مخدتش معاها ولا حبه سكر حتى!
اتعلمت حاجات مهمه من النمله دي:
- متخليش حاجه تشتت تفكيرك و تركيزك …
- سيبك من اللقمه اللي تيجي بالذل و المهانه و تقييد حريتك…
- اوعى تيأس … او تستسلم … او تفقد الأمل … انت بس اعمل اللي عليك!
#حواديت_في_البيزنس
