• Home
  • Blog
  • Resources
  • كيف تدخل على بنك المعرفة المصري من خارج مصر؟
كيف تدخل على بنك المعرفة المصري من خارج مصر EKB

كيف تدخل على بنك المعرفة المصري من خارج مصر؟

ناس كتير سألتني كيف تدخل على موقع بنك المعرفة المصري من خارج مصر؟ وكمان المقال هيفيد الناس اللي بتبحث عن كيفية الدخول على بنك المعرفة المصري من خارج مصر بشكل عام؟ هل فيه طريقه لكده فعلا؟

خلينا نعرف شويه حاجات سريعة كده
عشان تدخل على محتوى مفتوح فقط في دولة معينه … فأنت عشان تدخل على المحتوى ده فيه طريقتين:

  • تكون موجود جوه الدولة دي (مفاجأة ليك مش كده 😁)
  • خلال أدوات تغيير IP وVPN ودي خدمه (فيه منها مجاني و مدفوع) بتخلي جهازك كأنه في الدولة دي …عشان كده في خدمات كتيره متاحة في أمريكا و الناس بره أمريكا بتعرف تدخل لها ….

السؤال بقى … ليه المصريين اللي خارج مصر لما جربوا VPN عشان يدخل على بنك المعرفة  … معرفش يدخل؟!

لو حاولت تستخدم VPN  عشان تدخل بنك المعرفة المصري من خارج مصر، في الغالب مش هينفع! ليه؟
عشان ببساطه فكره VPN انه بيحط سيرفرات معينة في دول معينة عشان يخليك جوه الدول دي …
وبما أن مصر أم الدنيا …. (وغالبا بقية دول العرب) محدش حاطط فيها سيرفرات للخدمات دي… فمش هينفع تستخدم VPN عشان تدخل محتوى مفتوح فقط جوه مصر! … وده طبعا على حد علمي من الخدمات الي جربتها قبل كده …. مكنتش بشوف فيها مصر ولا أي دوله عربية

المهم نعمل ايه دلوقتي:

مبدأيا اعترف إنك غلطان عشان سايب مصر أم الدنيا و النعيم اللي احنا فيه و قاعد بره 😁
ثانيا تعالى نتكلم في المهم
عندك اتجاهين:

الاتجاه الأول: تخلي واحد صاحبك جوه مصر… ينزل لك الكتب اللي انت محتاجها …ودي طريقة عقيمه … عشان انت بتبقى عايز تستكشف الكتب بنفسك و تنزل اللي يعجبك ….

الاتجاه التاني: وهو دي سبب المقال هنا.. عن طريق التحايل (المشروع) على الموقع … باستخدام برامج المساعدة عن بعد أو مشاركة الشاشة و التحكم في الكمبيوتر عن بعد

خطوة خطوة كيف تدخل على بنك المعرفة المصري من خارج مصر؟

عندك طريقتين ممكن تعملهم هنا عشان تدخل على بنك المعرفة من خارج مصر:

  • استخدام أي برنامج محادثة مثل زووم Zoom وتفعل خاصية التحكم بالماوس
  • استخدام برامج المساعدة عن بعد مثل TeamViewer

الطريقة العملية الأولى: عن طريق برنامج زووم Zoom

هي أسهل طريقة لأغلب الناس خصوصا لشهرة برنامج زووم (او تقدر تستخدم بديل تاني له نفس الإمكانيات)

  1. هتعمل اجتماع على زووم مع صديق بداخل مصر عادي
  2. هتخليه يعمل مشاركة الشاشة، ويتيح لك إمكانية التحكم بالماوس
  3. هيسيب لك المتصفح شغال على بنك المعرفة، وبعد ما تبحث براحتك وتحمل الكتب على جهاز صديقك
  4. بعد كده تخلي صديقك يرسل لك الكتب عن طريق أي برنامج مشاركة ملفات مثل Google Drive أو Dropbox أو حتى بالإيميل/الواتساب لو الكتب مساحتها قليلة.

الطريقة العملية الثانية: عن طريق برنامج TeamViewer

هي أفضل طريقة لمحترفي الكمبيوتر والأنترنت، مبدئيا برنامج TeamViewer هو برنامج للمساعدة عن بعد في المشاكل التقنية في الكمبيوتر. وهو مجاني للاستخدام الشخصي الغير تجاري.

الخطوات هنا:

  1. هتنزل انت وصاحبك في مصر، برنامج TeamViewer
  2. لما صاحبك (اللي جوه مصر) يفتح البرنامج ده … هيطلع له ID & password متغيرين واستخدامهم بيبقى عشان تديهم لحد يحل لك مشكله فنيه في الكمبيوتر عن بعد…. دول بقى صاحبك يبعتها ليك

  3. وتدخل من خلال البرنامج علي جهاز صاحبك بنفس كلمة السر اللي بعتها ليك
  4. صاحبك يضغط موافقة انه يدخلك على جهازه وبعد كده يتيح لك امكانية التحكم في الماوس والكيبورد
  5. هتفتح المتصفح من جهاز صديقك جوه مصر على بنك المعرفة، وبعد ما تبحث براحتك وتحمل الكتب على جهاز صديقك
  6. بعد كده تخلي صديقك يرسل لك الكتب عن طريق أي برنامج مشاركة ملفات مثل Google Drive أو Dropbox أو حتى بالإيميل/الواتساب لو الكتب مساحتها قليلة.
  7. بعد ما تخلص يبقى خلي صديقك اللي في مصر يغير TeamViewer Password عن طريق أيقونه في البرنامج هتعمل له باسورد عشوائية تاني.

بس كده.. الموضوع شكله مكلكع لكنه بسيط جدا …. المهم إنك تلاقي صديق او حد من اهلك هنا في مصر يكون فيه شوية ثقة بينكم … عشان هيسيب لك الكمبيوتر شوية لحد ما تخلص. وانت طبعا خليك ضيف خفيف وخلص بسرعة.

اتمنى تكون الفكرة البسيطة دي تحل مشكله المصريين في الخارج للدخول على بنك المعرفة… خصوصا الباحثين منهم … وعايز يدخل على الكنز ده.

ملاحظات:

  • انا مجربتش الفكره بنفسي على موقع المعرفة …بس منطق الفكرة بيقول انه مفيش ما يمنع تماما انها تشتغل. البرامج دي جربتها قبل كده كتير في سيناريوهات مختلفة منها ان حد من بره مصر يصلح لي حاجات في الجهاز بتاعي….
  • مفيش أي ضرر للطرفين من استخدام الطريقة دي … في حالة الثقة لو موجودة بينكم.
  • أفضل تجربة استخدام لبنك المعرفة المصري هي من الكمبيوتر وليس من الموبايل، وبالتالي استخدم الأفكار اللي هنا دي على الكمبيوتر مش الموبايل.

يا ترى الموضوع يستاهل كل ده!

مبدئيا الخطوات دي بسيطة جدا

ثانيا اه يستاهل في حاله ان بتحب تتعلم وتقرأ كتب في مجالك … فده طريق شرعي (مش سرقة كتب من مواقع التحميل الغيرقانونية) ومجاني ليك يا مصري

ثالثا …. إلحق استخدم المنصة …لاني فيه صديق لي قالي ان المنصة ميعاد تجديد العقود مع الناشرين بيختلف من وقت للتاني … وشعان كده وهتلاحظ في الفيديوهات المنصة على اليوتيوب موجود ناشرين زي “أكسفورد” مبقاش موجود دلوقتي … وده معناه إن التعاقد مع الناشرين بيتغير …إلحق إستفاد بقى …ملكش حجه
قولي في التعليقات لو جربتها ونفعت معاك …. وربنا يوفقك في سعيك
وشارك المقال دلوقتي مع صاحبك اللي بره مصر وحابب يتعلم من كتب ودوريات حديثه جدا

بالمناسبة … نفسك تقرأ؟ عايز تعود نفسك على القراءة؟ عندي ليك خبر كويس

زي ما أنت عارف أو سمعت ان بنك المعرفة عليه كتب كتيره وكنوز حقيقية في مجالك، عشان كده عايز أشارك معاك كتابي بخصوص رحلتي في القراءة. سميت الكتاب “أخيرا قريت” عشان كان بقالي سنين كتيره جدا لا أقرأ!

وكيف تحولت من شخص لا يقرأ كتاب في السنة إلى قارئ يومي! وهو ده نفس الوعد اللي بوعده ليك بعد قراءة الكتاب ده!

اعرف تفاصيل اكتر عن الكتاب … هيغير فكرتك تماما عن اكتساب عادة القراءة.


الملحقات

Published on: January 28, 2020 - By: Taher Abdel-Hameed

Related Posts

المساعد الشخصي في التسويق – أهلا بـــ Automation Tools

المساعد الشخصي في التسويق – أهلا بـــ Automation Tools

سبعة مواقع لتحميل كتب جديدة في البيزنس و التسويق مجانا وبشكل شرعي

سبعة مواقع لتحميل كتب جديدة في البيزنس و التسويق مجانا وبشكل شرعي

إنفوجراف: 18 كتاب روعة في البيزنس و التسويق

إنفوجراف: 18 كتاب روعة في البيزنس و التسويق

كيف تحضر ندوات و إجتماعات رجال الأعمال في مصر مجانا من الغرفة التجارية الأمريكية

كيف تحضر ندوات و إجتماعات رجال الأعمال في مصر مجانا من الغرفة التجارية الأمريكية
>