من فتره كنت معدي على كوبري أكتوبر وكان راكب جنبي واحد صاحبي
شاف يافطة إعلانية ل ماكدونالدز وفيها سندويتش البرجر المشهور …
وسألني شوية أسئلة غريبة باعتبار بقى إني شغال في التسويق!
- هو ليه ماكدونالدز لسه بيعمل اعلانات شوارع؟
- مين لسه ميعرفش ماكدونالدز؟
انت ايه رأيك واجابتك ايه للسؤال ده؟
الإجابة السريعة النمطية هي انه بيعمل:
- Branding مستمر
- عشان يبقى فيه Awareness وعي بالعلامة التجارية واللوجو بشكل مستمر ويحافظ على Brand Equity
- عشان يقول انه لسه موجود
- عشان يبقى قدامك على طول!
واللي بيجاوب الإجابة دي ممكن يكونوا من عشاق ال Branding أو من ناحية تانية اللي بيشوفوا النظرة السطحية للموضوع! خصوصا النقطة الأخيرة محتاجة تفصيل أكتر.
أما الحقيقة انا قولت له تصدق عندك حق …. كل الناس (تقريبا) تعرف ماكدونالدز
بس تعالى نفكر شوية …. ماك بيقدم ايه؟
رد عليا وقالي سندويشات برجر سريعة Fast Food
قولت له جميل جدا … الاكل السريع ده …. عشان العميل ياخد القرار انه يشتري سندويتش برجر مثلا… بياخد القرار ده ازاي؟ بياخد وقت قد ايه؟ يا ترى بيقعد أيام/أسبوع يبحث في بدائل … ويقارن بين المنتجات البديلة … ويشوف مزايا وعيوب ………إلخ؟
قالي لاء …. ده قرار بيتاخد على الواقف كده! … وبالكتير بياخد كام ساعة لو محتار في نوعية الاكل (سمك – فراخ – لحمة – بيتزا …إلخ) خصوصا لو بنطلب الاكل في الشغل مع زملاء العمل او الأصحاب!
قولت له حلو جدا … انت كده رديت على سؤالك
قالي مش فاهم قصدك
قولت له:
بما ان ان منتج ماك هو عبارة عن أكل سريع … وقرار الشراء بتاع المنتج ده تصنيفه ما بين قرارت الشراء هو لأما شراء عفوي/فوري impulse purchase او بالكتير محتاج مجهود منك قليل جدا low involvement purchase
وبالتالي … وانت رايح او راجع من الشغل (او مشوارك على كوبري أكتوبر مثلا) …. شوفت الإعلان … شوفت صورة السندويتش … جري ريقك على الأكل …افتكرت جوعك …ساعتها ممكن تطلب منهم (ده لو بتحب النوع ده من الأكل)
فاللي هو عمله انه عارف ان منتجة …. منتج قرار الشراء بتاعه بالشكل ده (عفوي/سريع) فبيحط اعلاناته قدامك …بحيث ديما تفتكر إنك تطلب ويبقى ديما في دايرة الاعتبار consideration set في قرار الشراء للأكل السريع ده.
صاحبي عجبه الكلام جدا ….
ساعتها الحقيقة اتبسط وشوفت نفسي! (فقولت افتي شوية كمسوق…بس فتي بعلم!) فكملت وقولت له..
يا صديقي النظرة دي للموضوع من ناحية العميل (الطلبDemand ) …. وهي نظرة منطقية جدا زي ما انت شايف…
لكن عارف فيه نظرة تانية للموضوع هتعجبك جدا برضو
قالي ايه هي؟
قولت له … لو بصينا للموضوع من ناحية المطعم نفسه (العرض Supply) اللي بيعمله ماك بالإعلانات الكتيرة دي … بتخدمه على المدى البعيد وهي انها بتزود وتعلي عوائق دخول السوق ده Market Entry Barrier
وقبل ما صاحبي يبلم ويتنح …. كملت وقولت
عائق دخول سوق مطاعم البرجر السريعة…. مش كبير …. الموضوع مفهوش اختراع يعني ولا استثمارات ضخمه….
بالإعلانات الكتيرة دي … لو فيه منافس حب يدخل السوق (او حتى منافس حالي حب يجاري ماك في إعلاناته) كده بجانب تكاليف المطعم التشغيلية والثابتة هيبقى قدامه تكاليف ضخمه محتاجة تدفع في الإعلانات لو حب يدخل دايرة المنافسة دي….
واللي في الغالب المنافس ده هيلبس في الحيط ويخسر لو مشي في السكة دي! (بالتأكيد فيه سكك تانية افضل ليه لو حب ينافس هنا!)…لان ببساطه إعلانات ماك بالنسبة لحجم تعاملاته وفروعه كلام فاضي
اما بالنسبة لأي منافس تاني …. دي ميزانية ضخمه عليه! (اه صحيح انا مش متخصص في سوق المطاعم … فممكن يكون فيه أسباب تانية مش عارفها.)
النقطة دي هتبان اكتر في مثال زي بيبسي وكوكاكولا …..ليه بيعملوا الإعلانات المهولة دي!
بجانب نفس النظرة اللي فوق من ناحية الطلب demand side
فيه بعد استراتيجي للموضوع وهو منع أي منافس يدخل المجال ده …. واللي يدخل لأما يجارينا في الإعلانات ويخسر … او يبقى بتاع الحاجة الساقعة في ادغال الأقاليم والمحافظات والناس شيفاهم جودتهم ضعيفة وسعره رخيص جدا (اهي كلها ميه غير صحية بشوية سكر!).
عشان كده مشفناش منافس قوي قدام بيبسي وكوكاكولا ….. رغم ان السوق نفسه مفهوش موانع الدخول العالية زي أسواق تانية
ويوم ما تفائلنا خير بدخول منافس اجنبي زي BIG Cola للسوق المصري مثلا …. لم يحقق نجاحات كبيرة… ده غير العديد من الشركات المصرية اللي حاولت تدخل السوق ده … وخسرت او اشتغلت فقط على بعض الأقاليم.
صاحبي قالي تصدق … حلو مجال التسويق ده…بيخليك تشوف الموضوع من زوايا مختلفة ….
انا كنت فاكر الموضوع شوية إعلانات وفيسبوك وأفكار ابداعية creativity.. إلخ
طب لو عايز اتعلم التسويق من الزاوية الاستراتيجية دي يا طاهر اعمل ايه؟
قولت له عندي ليك خبر كويس … من فترة قريبة عملت كورس Marketing GPS
كورس كده اختراع!… خليط غريب ومتوازن من انه بيطلع بيك لفوووووق وتشوف النظرة الاستراتيجية للتسويق والسوق وبينزل بيك لتحت لتفاصيل عملية رائعة مش متعود تشوفها!
من خلال 16 مربع (مرحلة) تفكر فيها… هيبقى معاك نظام متكامل للتسويق
كل ده مع امثلة وتطبيقات على مستوى الشركات الصغيرة والمتوسطة!
واللي اتكلمنا فيه (في الحوار ده) عبارة عن جزء في مرحلة Customer Buying Process
واللي بتشوف فيها يا ترى العميل بيتشري المنتجات اللي في السوق بتاعك ازاي؟ ومين بيشارك في قرار الشراء ده؟
قالي ايوه عايز اعرف تفاصيل اكتر عن الكورس يا طاهر
قولت له (وبقولك انت دلوقتي) اتفضل كل التفاصيل في اللينك ده.
مستني اشوفك جوه الكورس.