من زمان وانا بسمع كل مدرسين الإنجليزي انك مينفعش تبدأ جملة ب
And – But
.. ولما أجي اكتب جمله ويكون الأنسب إني ابدأ بيهم بقعد ادور على بدائل عشان اتجنب القاعده دي
.. ولما كبرت فضلت القاعده دي جوايا …
ولما كنت بقرأ كتب انجليزية كنت بتفاجئ بإن هناك جمل المؤلف بادئ بيهم عادي جدا مع ان الانجليزي هي لغته الأم.
ارجع لمدرس اللإنجليزي بتاعي (ع اختلاف المراحل دراسيه او كورسات) و أقوله كده … يقولي اصلا كذا ..و كذا …
لحد سنه 2020 قابلت 2 من المدرسين الجامدين جدا فعلا .. أحدهم أوروبي الأصل
وسألتهم نفس السؤال
ردوا عليا رد مختلف شويه اقنعني الصراحه
قالوا لي هتلاقي مؤلف الكتاب أمريكي و الامريكان مبوظين اللغة و القواعد … و الأوروبي قالها وهو مضايق جدا على اللغه.
بس لما ركزت في كلامهم و في الكتب اللي بلاقي فيها كده ..لقيت إن فيه برضو مؤلفين بريطانيين (إنجليز) بيستخدموها عادي جدا … رغم إن الكتاب بيبقى مكتوب بلغة رسميه (مش عاميه) و فيه مراجعين وراه …..
لحد ما في ديسمبر 2020 كنت بقرأ الكتاب الجميل ده Everybody Writes
ولقيت فصل في الكتاب اسمه “أكسر قواعد ال Grammar أو على الأقل اكسر الخمس قواعد دي ”
ولقيت يا سيدي ان القاعده دي اول واحده 
يعني عادي جدا تبدأ جملة ب And وكمان عادي تبدأ ب But
بس كده .. حبيت اشارك معاكم اللفته دي
بالمناسبة الكتاب ده
Everybody Writes by Ann Handley
من الكتب الرائعه اللي تقراها … مكتوب للمسوقين .. عن كتابة المحتوى و كيفية تطوير مهارة الكتابة عندك.
وبالمناسبة هو من أكثر الكتب مبيعا في قسم التسويق على موقع أمازون من سنة 2014 لحد النهارده
هبقى أنقل لكم منه مقتتطفات من وقت للتاني كده
