fbpx
  • Home
  • Blog
  • Marketing
  • خطأ في صفحات البيع Sales Pages بيضيع منك العملاء والفرص! وكيف تصلحه؟

خطأ في صفحات البيع Sales Pages بيضيع منك العملاء والفرص! وكيف تصلحه؟

تخيل إنك خدت ميعاد اجتماع مع عميل بعد ما قدرت تشد انتباه عشان يوافق على الاجتماع معاك أصلا!
وفي اثناء الاجتماع وانت بتتكلم وبتشرح وبتبيع، اديت للعميل ريموت كنترول للتليفزيون اللي في غرفة الاجتماع عشان يقلب براحته؟
طب تخيل إنك مش بس عملت كده، ده التليفزيون ده عليها كل الحاجات اللي العميل ده متهم بيها فعلا وشبة اللي بيشوفها كل يوم!
مش بس كده، ده كمان عليه كل الفيديوهات اللي شبه منتجك والغالي والرخيص وحتى المجاني منها
مش بس كده، ده العميل سرح في التليفزيون والفيديوهات اللي عليه وسابك ونسي الاجتماع!!!

يا ترى أنت أيه رأيك في الموقف ده؟
قبل ما تتهم الشخص ده بعدم الذكاء وتضييع الفرص من أيده
الحقيقة إن كتير مننا بيقع في نفس الموقف بالظبط!!

ايه الحكاية؟

المشهد اللي فوق ده بيتكرر في صفحات هبوط Landing Pages كتيره بشوفها
وهي أن يبقى فيها فيديو مرفوع على اليوتيوب!
اللي هو أسوء من التليفزيون… لأنه بيعرض للعميل الحاجات اللي هو مهتم بيها وبيدور عليها واللي شبه اللي بيشوفها دلوقتي وهي منتجاتك وخدماتك!
وده بيحصل لما العميل يوقف الفيديو Pause بيظهر له فيديوهات مقترحه أسفل الشاشة!
وكمان في نهاية الفيديو في اللحظة الحاسمة اللي المفروض العميل ياخد فيها قرار انه يشتري أو اي Call-to-Action انت محدده أو على الاقل يقرأ بقية ال Landing Page
يقوم اليوتيوب عارض له نفس للحظة الذهبية دي، الفيديوهات المقترحة بس المرة دي كمان ملء كل الشاشة!

ده غير زرار اللي بيظهر اعلى شاشة الفيديو وهو إضافة ل Watch Later List اللي تعتبر مغارة لدفن كتير من الفيديوهات!

ضيف على كده إن مؤخرا بقى فيه زرار button على الفيديو اجباري من اليوتيوب Watch on YouTube بيظهر قبل ما العميل يفتح الفيديو أصلا! يعني من اول لحظة ممكن العميل يسيب الصفحة ويشاهد الفيديو على اليوتيوب!

كل ده وحط في اعتبارك قلة انتباه العميل بسبب الانترنت وكثرة المشتتات خصوصا انها محل اهتمامه وشبة اللي بيشوفة دلوقتي، كتير من العملاء بيسرح فعلا في دوامة اليوتيوب وينسى صفحتك ومنتجك وخدماتك …..إلخ.

 

تحليلات الويب Behavior Analytics Tools:

من كام سنة في أحد المشاريع اللي كنت شغال فيها، اكتشفت من خلال تحليلات الويب لسلوك الزوار Behavior Analytics Tools إن العملاء (الزوار) بيقفوا عند نقطة معينة في صفحة الهبوط ومش بياخدوا أي فعل بعدها … وقليل جدا اللي بيكمل قراءة scroll الصفحة بعدها!

لما حللنا الصفحة، أكتشفنا ان كان في النقطة دي فيديو مرفوع على اليوتيوب بيشرح لب المنتج والخدمة!
لك طبعا ان تتخيل أيه الي كان بيحصل للأغلب العملاء في النقطة دي!
بيقعوا ويتوهوا في دوامة اليوتيوب!

 

الحل العملي ايه؟

الفيديو جزء أساسي للأقناع في اغلب صفحات الهبوط (بالمناسبة يوجد صفحات هبوط رائعة من غير فيديو خالص ولا صور حتى! معتمده تماما على النص Copywriting)
فلو قررت تحط فيديو في صفحة الهبوط أو موقعك بشكل عام في الصفحات (المدونة حاجة تانية) يبقى ترفعه بطريقة لا تشتت العملاء والزوار.

ودي حاجة اتعلمتها من سنين: لا تترك مجال لتشتيت العميل على صفحة الهبوط، خصوصا لو على منصة شبة اليوتيوب. اللي بتعتبر خرم كبير بيوقع منك العملاء!

الحل هو إن هناك منصات لرفع الفيديو مناسبة أكتر للهدف ده غير اليوتيوب … اللي زي ماشوفنا انه مش مناسب اطلاقا للموضوع ده!
هشارك معاك أشهر تلك المنصات في التسويق للشركات الصغيرة والمتوسطة. وهقولك مزايا وعيوب كل واحده عشان تعرف تختار.

1 Wistia

هو مشهور للشركات اللي معتمدة بشكل كبير على التسويق بالفيديو
إمكانيات كتيره وتخصيص للفيديو المدمج Embed videos
مناسب للشركات الكبيرة أونلاين لان غالي جدا.
لك ان تعرف ان اغلب شركات ومواقع الكورسات الاونلاين بترفع فيديوهات على الموقع ده ضمنيا زي Teachable and Thinkific لأن ببساطه اداءه رائع في استضافة الفيديوهات
وأكيد طبعا مفيش أي إعلانات حول الفيديو بتاعك. ولا فيديوهات مقترحة.

عيوب Wistia:

  • سعره غالي جدا على الشركات الصغيرة والناشئة بيبدأ من 99 دولار في الشهر فقط!
  • حتى مع السعر الغالي ده للبداية بيديك عدد محدود من الفيديوهات(10 فيديوهات) وبعدها بيحاسبك بالسعر على كل فيديو!
  • خطة الاشتراك المجانية عنده محبطة أيضا للغاية: فقط 3 فيديوهات!

 

2 Vimeo

وهو الأشهر على الإطلاق، خصوصا بين الشركات الصغيرة والمتوسطة
طبعا بفصل خطة أسعارهم المناسبة جدا لينا.
بيبدأ بخطة اشتراك مجانية ممتازة … وبعد كده أسعاره منطقية جدا.
والحقيقة انه هو الخدمة اللي بستخدمها من اكتر من 6 سنين في مشاريع مختلفة ومن فتره اشتريت لموقعي اشتراك عليه لرفع فيديوهات الموقع. عشان كده هقولك مزايا وعيوبه عشان تقدر تحكم بنفسك

مزايا Vimeo

  • في الأصل هو يعتبر منصة اجتماعية للفيديو شبة اليوتيوب بس بخيارات رائعة في صالح أصحاب الفيديوهات
  • حتى مع خطة الاشتراك المجاني مفيش إعلانات حول الفيديو بتاعك … ولا فيديوهات مقترحه لو دمجت الفيديو على موقعك. قد يوجد بعض الفيديوهات المقترحة لو العميل بيشوف الفيديو على منصة Vimeo نفسها. لكن إعلانات مستحيل!
  • حتى في الاشتراك المجاني تقدر تعدل وتغير في ألوان الفيديو المدمج عنك على الموقع عشان يناسب التصميم
  • في كل الاشتراكات المدفوعة حتى الرخصية منها، خيارات رائعه لمحافظة على خصوصية الفيديو بتاعك … ودي ميزة مهمة جدا لو هترفع علية فيديوهات مدفوعة بمعني ان عميلك لازم يدفع ليك/يشترك عندك عشان يقدر يشوفها. مثل كورساتك اونلاين او فيديوهات شرح خاصة بالمشتركين عندك….إلخ
  • من أفضل المزايا اللي عجباني انا شخصيا وهي إنك تقدر تحدد (في كل الاشتراكات المدفوعة) ان الفيديو بتاعك لا يتم مشاهدته غير من على موقع/مواقع معينة حتى لا يستطيع أي احد مشاهدة الفيديو على منصة Viemo نفسها! الخاصية الرائعة دي اسمها Domain-level privacy . وهي اهم ميزة لو هترفع علية فيديوهاتك المدفوعة.
  • اسعاره طبعا مناسبة جدا لشركات الصغيرة والافراد SOHO
  • ممكن تعمل فيديوهات لا تفتح إلا بكلمة سر.
  • تقدر تحدد (على الاشتراكات المدفوعة) ايه اللي يحصل بعد انتهاء الفيديو (يعرض فيديوهات تانية ليك انت تحددها – لا يعرض حاجة – يعرض Call to Action معين ….إلخ)
  • ممكن على بعض خطط أسعار معينة تبيع الفيديوهات بتاعتك من خلال المنصة لعملائك ومعجبينك بدون أي إضافات تقنية تانية. أنا شوفت ناس بتبيع كورساتها عليه مباشرة.
  • تقدر تعدل في الفيديو واستبداله بدون ما تغير اللينك ولا الإحصاءات وكمان الاحتفاظ بكل النسخ وتاريخ كل التغييرات على الفيديو
  • تقدر تطلع من الفيديو صورة متحركة GIF بكل سهوله
  • تقدر انت وفريق (على خطط الاشتراك الأعلى) المشاركة على عمل وتحرير الفيديو Team Collaboration
  • حاليا كمان ينفع تسجل الشاشة Recording Screen or webcam من خلاله.

عيوب Vimeo:

هي مش عيوب على قد ما هي قيود عشان ترفع اشتراكك كل ما تزداد احتياجاتك مثل:

  • على الاشتراك المجاني تقدر ترفع 500 ميجا فقط في الأسبوع وإجمالي المساحة المتاحة ليك على الحساب 5جيجا
  • على الاشتراك المجاني مفيش طبعا خيارات خصوصية الفيديو اللي اتكلمنا عليها
  • على الاشتراكات المدفوعة (الرخيصة) أيضا فيها بعض القيود على المساحة بس مش هتضايقك في حاجة في الغالب.
  • على الأشتراك المجاني: خيارات تخصص Embeded محدودة شوية، مثلا مش هينفع تشيل زراير
     Like – Watch Later – Share

أحسن نسبة خصم على اشتراك Vimeo وملاحظات:

بالمناسبة تقدر من خلال الرابط ده تحصل على 25% خصم على الاشتراك السنوي على Vimeo

  • الخصم على اول سنة اشتراك فقط
  • دي أكبر نسبة خصم متاحة على Vimeo على حد علمي، وكمان اكتر من عرض الجمعة السوداء Black Friday اللي على حد علمي مش بيعمل فيها خصم أصلا!
  • السر في الخصم انه Vimeo منصة محترمة لصناع الفيديو، فمن باب تشجيع اصدقائهم على الاشتراك بيديهم اعلى نسبة خصم للأصدقاء خلال رابط Friend Referral
  • الخصم يعمل فقط للحسابات الجديدة، يعني لو عندك حساب مجاني مش هينفع بنفس الأيميل. وبالتالي قد يعمل الخصم معك من خلال متصفح Browser جديد. عموما تأكد وجود خصم 25% على الأسعار المعروضة حتى تتأكد انه شغال معاك ستظهر الصفحة مثل الشكل اللي في الصور اسفل المقال هنا.
  • تقدر بعد الدفع تختبر الخدمة لمدة 30 يوم، لو لم تعجبك استرجع فلوسك.

نصيحة: متى ستحتاج الاشتراك المدفوع على Vimeo؟

انت مش محتاج تدفع على Vimeo في الحالات الاتية:

  • لو احتياجات من الفيديوهات اقل من 5 جيجا واقل من 500 ميجا في الأسبوع
  • مش محتاج خيارات في الخصوصية، يعني كل الفيديوهات عندك متاحة لكل الناس على العام!

انت لازم تشترك باشتراك مدفوع على Vimeo في الحالات الاتية:

  • لو محتاج تخصيص كامل للفيديوهات المدمجة لاستخدامها في صفحات الهبوط مثلا.
  • لو محتاج تخبي فيديوهات معينة فقط للعملاء المشتركين عندك
  • لو محتاج تستخدمه في كورسات اونلاين مثلا
  • لو محتاج تشتغل انت وفريق العمل معاك على تحرير نفس الفيديوهات.

 

هل هناك حلول تانية لو أنت مصر تستخدم YouTube؟

فيه بعض Work-arounds عشان تتغلب على عيوب اليوتيوب، ولكن لن تقضي عليها تماما.
مثل في بعض Landing Pages tools أدوات عمل صفحات الهبوط مثل الأداة الرائعة Thrive Architect (لم أرى الخيارات دي في أدوات تانية الصراحة) هتلاقي بعض الخيارات لما تحط لينك من اليوتيوب مثل الصورة كده:

Thrive Architect options in YouTube Videos

  • Optimize Related Videos واللي بتخلي اغلب الفيديوهات المقترحة من القناة عندك.
  • Video Thumbnail اللي بتخبي خيارات اليوتيوب قبل ما العميل يشغل الفيديو

طبعا نفس الخيارات ينفع تعملها لو بتعرف تغير في كود Embedded Video from YouTube
بس الحقيقة برضو كل ده مش هيحل مشكلة تشتيت دماغ الزوار/العملاء بفيديوهات أخرى.

بالمناسبة زمان كنت بتحط كود في Embedded Link من اليوتيوب بيلغي الفيديوهات المقترحة بس الكلام ده اتلغى من اليوتيوب رسميا.

 

هل فيه بدائل تانية تقدر تشوفها؟

اه طبعا ان عرضت عليك اللي بمستخدمه شخصيا وهو Vimeo وهو كمان الأرخص على الاطلاق. بالإضافة إلى Wistia. أما لو عايز تستكشف بدائل أخرى فتقدر تبحث بنفسك عن:

أتمنى يكون المقال عجبك، وساعدك على حل المشكلة دي في صفحات الهبوط Landing Pages

 

Published on: June 3, 2021 - By: Taher Abdel-Hameed

Related Posts

ليه ماكدونالدز لسه بيعمل إعلانات في الشوارع

ليه ماكدونالدز لسه بيعمل إعلانات في الشوارع

أقولك سر؟ أنا اطردت من شغلي في التسويق

أقولك سر؟ أنا اطردت من شغلي في التسويق

حكاية بياع الفريسكا اللي زود مبيعاته 10 اضعاف بحيلة تتدرس في التسويق

حكاية بياع الفريسكا اللي زود مبيعاته 10 اضعاف بحيلة تتدرس في التسويق

أنواع المسوقين في مصر! اضحك عشان نطور من أنفسنا!

أنواع المسوقين في مصر! اضحك عشان نطور من أنفسنا!
>